Ordu.az xəbər verir ki, bu barədə xarici KİV-lər məlumat yayıb.
Ukrayna Müdafiə Nazirliyinin 2026-cı il aprelin 30-da yaydığı məlumata görə, Ukrayna Hərbi Hava Qüvvələri pilotların fərqli məkanlarda təlim keçməsinə və missiyalara hazırlaşmasına imkan yaradan mobil F-16 uçuş simulyatorlarını qəbul edib.
Açıqlamada qeyd olunub ki, simulyatorlar Ukrayna üzərində döyüş zamanı pilotların qarşılaşa biləcəyi relyef və hava şəraitini real şəkildə imitasiya edəcək formada proqramlaşdırılıb. Müdafiə naziri Mykhailo Fedorov isə bildirib ki, bu simulyatorlar bir nöqtədən digərinə daşına bilir və beləliklə müxtəlif bazalarda çevik şəkildə istifadə oluna bilir.
“Kyiv Post”un məlumatına görə, Fedorov bildirib: “F-16 döyüş təyyarələri artıq Ukrayna səmasını qoruyur. Hava hədəflərini zərərsizləşdirmə effektivliyini artırmaq üçün pilotların təlimlərini davamlı şəkildə inkişaf etdirməli və təlimdən döyüş istifadəsinə keçid müddətini qısaltmalıyıq”. Bununla yanaşı, Fedorov simulyatorların təqdim olunmasına töhfə verən Niderland, Çexiya və Avstriya hökumətlərinə, Hərbi Hava Qüvvələri İmkanları Koalisiyasına və Ukraynanın hava əməliyyat imkanlarının inkişafına dəstək verən çoxmillətli qrupa təşəkkür edib.
Mobil simulyatorların istifadəyə verilməsi Ukrayna Hərbi Hava Qüvvələrinin NATO standartlarına uyğun təlim proqramının bir hissəsi kimi qiymətləndirilir. Rusiya Hərbi Hava Qüvvələri ilə müqayisədə say baxımından az və texniki cəhətdən bəzən əlverişsiz mövqedə olan ukraynalı pilotlar müharibənin əvvəlindən etibarən dəyişkən aerodromlardan istifadə edərək mobil yerləşmə taktikaları tətbiq edir.
Rusiya qüvvələrinin Ukraynadakı iri hava bazalarını mütəmadi hədəfə alması nəticəsində zəruri olan bu yanaşmanın Ukrayna aviasiyasının fəaliyyətini davam etdirməsinə imkan verdiyi bildirilir. Lakin düzgün təlim üçün lazım olan təlimçilərin və simulyatorların çox vaxt pilotların fəaliyyət göstərdiyi bazalarda yerləşməməsi təlim proseslərini çətinləşdirir.
“Militarnyi” tərəfindən hazırlanan hesabatda qeyd olunur ki, “simulyatorlar vasitəsilə heyət mürəkkəb döyüş ssenarilərini tətbiq edə, reaksiya sürətini, qərarvermə qabiliyyətini və situasiya məlumatlılığını inkişaf etdirə bilir”. Eyni zamanda simulyator texnologiyasının real uçuşdan əvvəl müəyyən döyüş tapşırıqlarının ətraflı şəkildə simulyasiya edilməsinə imkan verdiyi vurğulanır.
Hesabatda sistemin əsas üstünlüklərindən birinin hərəkət qabiliyyəti olduğu və bunun da daimi təhlükə şəraitində pilotların təhlükəsizliyi və avadanlıqların qorunması üçün kritik əhəmiyyət daşıdığı qeyd olunur.
Ukrayna Hərbi Hava Qüvvələri və F-16-lar
Açıq mənbələrə görə, Ukrayna Hərbi Hava Qüvvələri Rusiya-Ukrayna müharibəsində 1990-cı illərə aid təxminən 35-40 ədəd F-16C döyüş təyyarəsindən istifadə edir. Bu təyyarələr bəzi Rusiya döyüş təyyarələri ilə müqayisə oluna bilsə də, “Sukhoi Su-30SM2” (NATO kod adı: “Flanker-H”) və “Sukhoi Su-57” (NATO kod adı: “Felon”) kimi ən qabaqcıl rus təyyarələrindən geri qalır.
Bu çərçivədə Ukrayna Hərbi Hava Qüvvələri F-16 parkından əsasən kritik hədəflər üzərində hava məkanını qorumaq və Ukraynadakı mülki ərazilərə yönəldilən Rusiya qanadlı raketlərini qarşısını almaq üçün istifadə edir.
“Kyiv Post”un məlumatına görə, Ukrayna Niderlanddan 24, Danimarkadan isə 12-19 ədəd F-16 qəbul edib. Belçika və Norveç müvafiq olaraq 30 və 6 təyyarə vəd etsə də, hələlik təhvil verilməyib. Verilən təyyarələrin əksəriyyətinin 35-45 il yaşı olduğu bildirilib. Ukrayna 2024-cü ilin ortalarından F-16larla əməliyyatlara başladıqdan sonra 4 təyyarə itirdiyini təsdiqləyib.
Sevinc Əliyeva
Ordu.az
