Ordu.az xəbər verir ki, bu barədə Ermənistan KİV-ləri məlumat yayıb.

Paşinyan qeyd edib ki, Ermənistanın müstəqilliyindən etibarən ilk dəfə Ermənistanın bütün sərhəd keçid məntəqələri nəzarət altındadır və orada xidmət Ermənistanın sərhəd qoşunları tərəfindən həyata keçirilir.

“Artıq iki ildir Ermənistanın sərhədləri ilə bağlı malik olduğumuz növbəti mühüm yenilik ondan ibarətdir ki, Azərbaycanla delimitasiya və demarkasiya olunmuş 12 kilometrlik sərhəd hissəmiz var və orada Ermənistanın sərhəd qoşunları xidmət həyata keçirir. Bu da çox vacib və müstəsna vəziyyətdir və qeyd etməliyəm ki, həmin 12 kilometr Ermənistan və Azərbaycan sərhədinin bəlkə də yeganə hissəsidir ki, burada Ermənistan və Azərbaycan silahlı qüvvələrinin nümayəndələri dəbilqəsiz, zirehli gödəkçəsiz və avtomatların daraqlarını avtomatların üzərində deyil, çantalarının içində saxlayaraq xidmət həyata keçirirlər”, - deyə o vurğulayıb.

Paşinyan deyib ki, bu, Ermənistan və Azərbaycanın sərhəd qoşunları, hökumətləri arasında əldə edilmiş razılaşma ilə baş verib.

“Bu, əlbəttə, Ermənistan və Azərbaycanın sərhəd qoşunları, hökumətləri arasında əldə edilmiş razılaşma ilə baş verib və bu, bizi düşünməyə və ya açıq olanı görməyə məcbur edir ki, sərhəd qoşunları adətən sülh simvoludur, çünki sərhəddə sərhədçilərin dayandığı yerdə böyük ehtimalla və ya əksər hallarda həmin sərhəddə sülh hökm sürür.

Bizim arzumuz və məqsədimiz Ermənistan sərhədinin bütün hissələrinin sərhəd qoşunlarının məsuliyyəti altında olmasıdır. Biz bu yolla gedirik. Yaxın gələcəkdə, əlbəttə, biz Ermənistan və Azərbaycan Respublikası arasında delimitasiyanı davam etdirəcək və məntiqli müddətlərdə başa çatdıracağıq”, - deyə o bildirib.

Alpər Mövludoğlu
Ordu.az