Ordu.az xəbər verir ki, bu barədə Türkiyə KİV-ləri məlumat yayıb.
Prezident Rəcəb Tayyib Ərdoğanın liderliyi ilə son 23 ildə qurduqları innovasiya və araşdırma ekosistemi, planlı sənaye zonaları və həyata keçirdikləri islahat xarakterli addımlarla ölkəni yüksək əlavə dəyərli və rəqabətədavamlı istehsalın mərkəzinə çevirdiklərini bildirən Kacır hərbi pilotsuz uçuş aparatı istehsalında dünyada birinci, kommersiya nəqliyyat vasitələri, günəş panelləri, avtobus, məişət texnikası, polad və sement sahələrində Avropada lider türk sənayesi qurduqlarını qeyd edib.
İstehsal gücü və qabiliyyətlərindəki möhtəşəm sıçrayışı ixracatda əldə etdikləri yeni rekordlarla taclandırdıqlarını vurğulayan Kacır deyib: “2002-ci ildə 36 milyard dollar olan illik məhsul ixracımızı emal sənayemizin öncülüyü ilə 273,5 milyard dollara yüksəltdik. Bir çox Avropa ölkəsində sənayenin zəiflədiyi pandemiyadan sonrakı dövrdə istehsal və ixracatda rekordlar qırdıq”.
Kacır avtomobildən tikinti sektoruna, elektronikadan kimyaya, maşınqayırmadan müdafiə və aviasiyaya qədər geniş spektrdə qabaqcıl texnologiya tətbiqləri üçün kritik giriş təmin edən alüminium sənayesinin bu uğurun memarları arasında olduğunu qeyd edərək bildirib: “1500 şirkətdə 35 mindən çox insana məşğulluq təmin edən sektor yüksək əlavə dəyərli istehsal strukturu, inkişaf etmiş məhsul keyfiyyəti, geniş məhsul çeşidi və texnoloji dərinliyi ilə ölkəmizin qlobal tədarük zəncirlərində mövqeyini möhkəmləndirir. 2025-ci il sektorun yeni hədləri geridə qoyduğu sıçrayış ili oldu. Qlobal şoklara baxmayaraq sektor ixracımız əvvəlki ilə nisbətən 7 faiz artaraq 5,6 milyard dollara çatdı. İxracımızın həcmi ilə yanaşı əlavə dəyəri də artaraq ton başına 4 min 500 dolları keçdi. Bu gün alüminium məhsulları ixracında dünyada 14-cü yerdəyik. Çubuq və profil ixracında isə dünyada 3-cü, Avropada 2-ci sıradayıq”.
Türkiyəni Avropanın aparıcı alüminium istehsal mərkəzlərindən birinə çevirəcək, sektorun rəqabət qabiliyyətini gücləndirəcək və xarici bazarlardakı təsirini artıracaq addımları qətiyyətlə həyata keçirdiklərini bildirən Kacır sözlərini belə davam etdirib:
“Şübhəsiz qlobal alüminium bazarı karbonsuzlaşma, dayanıqlılıq və qabaqcıl istehsal texnologiyalarının istehsal proseslərinə inteqrasiyası ilə dəyişir. Yeni dövrün dinamikasını düzgün oxuyan ölkələr rəqabət güclərini artıracaq və qlobal bazarlarda daha möhkəm mövqe əldə edəcək. Ənənəvi istehsal modellərinə qapanan ölkələr isə qlobal yarışda hündürlük itirəcək. Biz doğru strategiya, qətiyyətli baxış və uyğun maliyyətli maliyyələşmə ilə bu transformasiyanı ölkəmiz üçün mühüm fürsətə çevirmək imkan və qabiliyyətinə sahibik. Bu anlayışla hazırladığımız Alüminium Sektoru Aşağı Karbonlu Yol Xəritəsində sektorun aşağı karbonlu istehsala keçid üçün ehtiyac duyduğu modernizasiya, bərpa olunan enerji inteqrasiyası və tullantı istiliyin geri qazanılması investisiyalarını müəyyənləşdirdik.
Sənayeçilərimizin qlobal maliyyə mənbələrinə çıxışını asanlaşdırmaq məqsədilə son dövrdə Dünya Bankı ilə əməkdaşlıq çərçivəsində 1 milyard dollardan çox maliyyəni ölkəmizə cəlb etdik. Avropa Yenidənqurma və İnkişaf Bankı ilə birgə həyata keçirdiyimiz “Türkiyə Sənaye Karbonsuzlaşdırma İnvestisiya Platforması” ilə sənayenin yaşıl transformasiya investisiyalarına 2030-cu ilə qədər 5 milyard avro beynəlxalq maliyyə təmin etmək üçün mühüm addım atdıq. Yaşıl Transformasiya Proqramı ilə emal sənayesi şirkətlərinin dövri iqtisadiyyat, tullantı idarəetməsi, resurs səmərəliliyi və karbon emissiyalarının azaldılmasına yönəlmiş investisiya layihələrinə 226 milyon lirəyə qədər nağd dəstək, investisiyaların 40 faizinə qədər vergi güzəşti təqdim edirik. Sektorumuz həm yeni ərinti məhsulları investisiyaları, həm də yaşıl və rəqəmsal transformasiyaya verdiyimiz dəstəklərlə böyüməsini davam etdirəcək və inşallah Avropanın 1 nömrəli alüminium istehsal və emal mərkəzi mövqeyinə çatacaq”.
“Bütün dünyanın həsədlə baxdığı müdafiə sənayesi ekosistemi qurduq”
Nazir Kacır açılışı həyata keçirilən 65 milyon dollar investisiya dəyərinə malik müəssisənin sənayenin yüksək əlavə dəyərli istehsal, ixracyönlü böyümə və yaşıl transformasiya hədəflərinə xidmət edən strateji qazanc olduğunu bildirib.
Son 23 ildə Prezident Ərdoğanın liderliyi ilə bütün dünyanın həsədlə baxdığı müdafiə sənayesi ekosistemi qurduqlarını qeyd edən Kacır deyib: “Bu gün öz pilotsuz uçuş aparatlarını, silahlı pilotsuz uçuş aparatlarını, helikopterlərini, dəniz platformalarını, quru texnikasını, sursatını və ağıllı müdafiə sistemlərini layihələndirən, inkişaf etdirən, istehsal edən və rəqabətli şəkildə dünyaya ixrac edən Türkiyədən bəhs edirik. Müdafiə məhsullarında yerli tədarük nisbətimizi 20 faizdən 80 faizə yüksəltməyimizi təmin edən bu böyük sıçrayışın arxasında kritik komponentlərdə yerliləşmə iradəsi, güclü AR-GE infrastrukturu və qətiyyətlə qurduğumuz istehsal infrastrukturu dayanır”.
“Sima Alüminium” kimi yüksək texnologiyaya əsaslanan istehsal həyata keçirən müəssisələrin sektorun ehtiyac duyduğu yüngüllük, dayanıqlılıq və yüksək möhkəmlik təmin edərək müdafiə sənayesinin inkişafını dəstəklədiyini bildirən Kacır qeyd edib: “Sima Alüminium”un güclü AR-GE təcrübəsi və istehsal metodologiyası ilə pilotsuz uçuş aparatlarından milli piyada tüfənginə, “Fırtına” haubitsasından zirehli texnikaya, kamikadze dronlardan sursat istehsalına qədər ölkəmizin aparıcı müdafiə layihələrində oynadığı rolu təqdirlə qarşılayırıq. Dünyanın aparıcı müdafiə bazarlarına 10 milyon dollardan çox ixracı alüminium sektorunun və müdafiə sənayemizin qlobal rəqabət gücünün göstəricisidir”.
Kacır açılışı edilən müəssisənin indiyədək böyük ölçüdə xaricdən təmin edilən yüksək ərintili alüminium ekstruziya məhsullarının ölkə daxilində istehsalını təmin edəcəyini bildirərək deyib: “Müəssisə müdafiə sənayemizin qabiliyyətlərini gücləndirərkən Milli Texnologiya Hərəkatımızın tam müstəqillik hədəfinin sahədə konkret əkslərindən biri olacaq. Sənayemizin ikili transformasiya prosesinə uyğunlaşması ilə bir addım öndə olan müəssisənin ölkəmizə və millətimizə xeyirli olmasını arzulayıram”.
Daha böyük, daha güclü, tam müstəqil və rifahlı Türkiyə yolunda atılan bu addımın ölkənin parlaq gələcəyinə atılmış güclü imza olacağını vurğulayan Kacır yüksək əlavə dəyərli və səmərəli istehsala töhfə verəcək müəssisənin reallaşdırılmasında əməyi olanları təbrik edib.
“Sima Alüminium”un baş direktoru Mustafa Çığlı isə bu investisiyanın təkcə iqtisadi təşəbbüs deyil, ölkəyə olan inam və etimadın konkret göstəricisi olduğunu bildirib.
Türkiyənin istehsal gücünə, sənayesinə və gələcəyinə inamla investisiyalarını qətiyyətlə davam etdirəcəklərini vurğulayan Çığlı deyib: “Bu istiqamətdə 2027-ci ilin birinci rübündə Sakaryada 65 min kvadratmetr qapalı sahəyə malik, təxminən 80 milyon dollar investisiya dəyərində yeni zavodun təməlini qoymağı planlaşdırırıq. İnşallah hörmətli nazirimizlə həmin müəssisənin də açılışını etməyi Allah bizə nəsib edər”.
Baş direktor Mustafa Çığlı və “Sima Alüminium”un baş koordinatoru Celalettin Kırboz çıxışlardan sonra nazir Kacıra tablo hədiyyə ediblər. Protokol üzvləri ilə açılış lentini kəsən Kacır daha sonra fabriki gəzib.
Proqrama Kocaeli valisi İlhami Aktaş, Böyükşəhər Bələdiyyəsi sədr müavini Hasan Soba, Dilovası kaymakamı Metin Kubilay və Dilovası bələdiyyə sədri Ramazan Ömeroğlu da qatılıb.
Sevinc Əliyeva
Ordu.az
