Ordu.az xəbər verir ki, bu barədə xarici KİV-lər məlumat yayıb.
ABŞ hərbi rəsmiləri cümə günü İranda qəzaya uğradığı ehtimal edilən F-15E təyyarəsi və onun heyətinin vəziyyəti barədə hələ ki, rəsmi məlumat verməyiblər. Halbuki mediada təyyarədə olan iki hərbçidən birinin xilas edildiyi bildirilir.
ABŞ rəsmilərinin susqunluğu aktiv döyüş əməliyyatları zamanı adi haldır və bu, cümə günü günortadan sonra ABŞ-də başladığı bildirilən geniş xilasetmə əməliyyatı ilə də uyğun gəlir. Bu zaman İranda artıq gecə düşmüşdü.
Task & Purpose nəşri cümə günü bir təyyarənin itirildiyini təsdiqləyib. “Washington Post”, “CBS News” və “Axios” daxil olmaqla bir neçə digər media orqanı da heyət üzvlərindən birinin xilas edildiyini bildirib. İkinci heyət üzvü barədə isə məlumat yoxdur.
Hərbi Hava Qüvvələrinin F-15E “Strike Eagle” təyyarələri pilot və silah sistemləri zabitindən ibarət iki nəfərlik heyətlə uçur. Bu tip təyyarələrin bir neçə eskadrilyasının “Epic Fury” əməliyyatında iştirak etdiyi məlumdur. Onlardan biri Böyük Britaniyadakı “Lakenhit” hərbi hava bazasından fəaliyyət göstərir.
İran dövlət mediasında yayımlanan və təsdiqlənməmiş videoda qəzaya uğramış təyyarənin qalıqları göstərilir. Videoda görünən qırmızı quyruq nişanları həmin bazanın 494-cü qırıcı eskadrilyasına uyğun gəlir.
Nə Pentaqon, nə də ABŞ Mərkəzi Komandanlığı F-15 və onun heyəti barədə rəsmi açıqlama verib.
Ağ Evin sözçüsü Karolayn Livitt bildirib ki, prezident Donald Tramp məsələ ilə bağlı məlumatlandırılıb.
İran dövlət televiziyasına bağlı bir kanalın aparıcısı cümə günü bildirib ki, ABŞ pilotu İranın cənub-qərbində katapult edib və onu səlahiyyətlilərə təhvil verən şəxs mükafat alacaq.
Sosial şəbəkələrdə yayılan təsdiqlənməmiş video və fotolar
“Washington Post” İranın qərbi üzərində ABŞ-yə məxsus C-130 təyyarəsinin iki HH-60H “Pave Hawk” helikopterini havada yanacaqla təmin etdiyini göstərən videonu təsdiqləyib. Bu helikopterlər axtarış-xilasetmə əməliyyatları üçün istifadə olunur.
İran dövlət mediası “X” platformasında ABŞ hərbi təyyarəsinin qalıqlarını göstərdiyi iddia edilən fotolar yayıb, lakin “Task & Purpose” bu görüntüləri müstəqil şəkildə təsdiqləyə bilməyib.
Hansı hərbi hissənin həmin F-15 təyyarəsinə sahib olduğu barədə rəsmi məlumat yoxdur. Sosial şəbəkələrdə yayılan bir fotoda vurulan təyyarənin bort hissəsinin göstərildiyi iddia olunur.
Böyük Britaniyadakı Lakenhit bazasından F-15 təyyarələri yanvar ayında ABŞ-nin bölgədə hərbi mövcudluğunu artırması çərçivəsində Yaxın Şərqə yerləşdirilmişdi.
Cümə günü ABŞ Hərbi Hava Qüvvələrinin 48-ci Qırıcı Qanadının sözçüsü bu məsələ ilə bağlı sualları Mərkəzi Komandanlığa yönləndirib.
Fevralın 28-də başlayan və “Epic Fury” adlandırılan ABŞ hərbi əməliyyatı çərçivəsində ABŞ ordusu bir neçə pilotlu və pilotsuz uçuş aparatını itirib. Bunlara martın 1-də Küveyt üzərində ehtimal olunan dost atəşi nəticəsində vurulan üç F-15 təyyarəsi və 12 martda İraqda qəzaya uğrayan KC-135 yanacaqdaşıyan təyyarə daxildir. Həmin qəzada altı hərbçi həlak olub.
Sevinc Əliyeva
Ordu.az
