Onun təyinatı ABŞ müdafiə naziri Pit Heqsetin 2023-cü ildən bu vəzifəni tutan Rendi Corcdan istefa verməsini tələb etməsindən sonra baş verib.

Bu vəzifə Ordudakı ən yüksək postdur və adətən bu vəzifəni tutanlar dörd il müddətinə xidmət edirlər.

Pentaqonun sözçüsü Şon Parnell bildirib ki, qərargah rəisinin müavini olan LaNev “döyüş təcrübəsi ilə sınanmış, onilliklər boyu əməliyyat təcrübəsinə malik liderdir və nazir Heqset tərəfindən bu administrasiyanın baxışını qüsursuz şəkildə həyata keçirmək üçün tam etibar edilən şəxsdir”.

Bu təyinat ABŞ-nin İrana qarşı hərbi əməliyyatlarının davam etdiyi və Heqsetin ABŞ Silahlı Qüvvələrində daha geniş yenidənqurma həyata keçirdiyi bir vaxta təsadüf edir.

Müdafiə naziri bir ildən bir qədər artıq müddətdə ondan çox yüksək vəzifəli rəhbəri vəzifədən uzaqlaşdırıb və bu proses LaNevin Pentaqonda daha yüksək vəzifələrə irəliləməsinə imkan yaradıb.

Bu, onun Heqset dövründə karyerasında üçüncü irəliləyişdir.

O, 2026-cı ilin fevralında Ceyms Mingusun bu vəzifədən vaxtından əvvəl təqaüdə çıxmasından sonra qərargah rəisinin müavini təyin edilib.

Həmin təyinat zamanı Heqset onu “nəsli təmsil edən lider” kimi xarakterizə edərək bildirmişdi ki, o, “ordunun döyüş ruhunu bərpa etməsinə, müasir döyüş meydanına uyğun yenidən qurulmasına və dünyadakı düşmənlərimizi çəkindirməsinə kömək edəcək”.

Bundan əvvəl LaNev 2025-ci ilin aprelindən etibarən Heqsetin baş hərbi köməkçisi vəzifəsində çalışıb.

O, bu vəzifədə ötən ilin yanvarında Pentaqona daxil olduqdan bir neçə ay sonra Heqset tərəfindən vəzifədən uzaqlaşdırılan general-leytenant Cennifer Şortu əvəz etmişdi.

LaNev 1990-cı ildə Arizona Universitetindən hərbi xidmətə qoşulduqdan sonra orduda bir sıra yüksək vəzifələrdə çalışıb.

36 illik xidməti ərzində o, Cənubi Koreyada Səkkizinci Ordu və 82-ci Hava-Desant Diviziyası da daxil olmaqla bir neçə hərbi birliyə rəhbərlik edib.

O, həmçinin Əfqanıstan və İraqda daxil olmaqla bir neçə döyüş əməliyyatında iştirak edib.

Sevinc Əliyeva
Ordu.az