Ordu.az xəbər verir ki, bu barədə xarici KİV-lər məlumat yayıb.

2026-cı il aprelin 1-də yayılan məlumata görə, sifarişə transmissiyaların çatdırılması ilə yanaşı, geniş təlim və ehtiyat hissələri paketi də daxildir. Çatdırılmaların 2026-cı ilin üçüncü rübündən 2033-cü ilə qədər həyata keçirilməsi planlaşdırılır.

“Renk” tərəfindən hazırlanmış HSWL 295 hidromexaniki sürət-yönəltmə transmissiyası mühərrikin eninə yerləşdirildiyi “U-konfiqurasiyalı” tank hərəkət sistemləri üçün xüsusi olaraq hazırlanıb. Beş irəli və beş geri sürətə malik olan bu sistem 1.200 kVt-a qədər mühərrik gücü və 70 tona qədər texnika kütləsi üçün optimallaşdırılıb.

İnteqrasiya olunmuş əyləc və idarəetmə sistemi ilə birlikdə çəkisi 2,5 ton olan transmissiya yüksək güc sıxlığı, kompakt quruluşu və çətin şəraitdə dayanıqlılığı ilə seçilir.

“Renk” qrupunun nəqliyyat vasitələri üzrə mobil həllər üzrə baş icraçı direktoru Mihael Mazur bildirib: “HSWL 295 ilə müasir döyüş texnikası üçün ekstremal şəraitdə etibarlı və dəqiq həll təqdim edirik. Bu əsas döyüş tankı proqramı beynəlxalq bazarlara çıxışımızı gücləndirir və NATO mühitində inkişaf strategiyamıza xidmət edir”.

Polşa və K2 “Black Panther” əlaqəsi

Rəsmi açıqlamada alıcı ölkənin adı göstərilməsə də, sənaye məlumatları bu ölkənin Polşa olduğunu göstərir. HSWL 295 transmissiyası Polşanın artıq geniş miqdarda silahlanmasına daxil etdiyi Cənubi Koreya istehsalı K2 “Black Panther” tanklarında istifadə olunur.

Polşa indiyədək HSWL 295 transmissiyalı 180 ədəd K2 tankı qəbul edib. İkinci 180 ədədlik partiyanın isə yaxın vaxtlarda çatdırılması gözlənilir. Həmçinin 2025-ci ilin oktyabrında Polşa 70 milyon avro dəyərində HSWL 295 sifarişi verib.

Polşada başlanacaq lisenziyalı istehsal ilə 2030-cu ilə qədər ümumi “Panther” tanklarının sayının 1000 ədədə çatdırılması planlaşdırılır. Bu genişmiqyaslı istehsal proqramı “Renk” şirkətinin əldə etdiyi 157 milyon avroluq yeni sifarişin əsas mənbəyi hesab olunur.

Sevinc Əliyeva
Ordu.az