Ordu.az xəbər verir ki, bunu Ermənistanın “Milli Gündəm” partiyasının təsisçi komissiya qrupunun üzvü Avetik Çalabyan öz “Facebook” səhifəsində yazıb.
O, Azərbaycan və Ermənistan büdcə layihələrində müdafiə xərclərini müqayisə edib.
“Həftəyə olduqca vacib məsələ ilə başlamaq istəyirəm. Cəmi 10 ay öncə bu barədə yazdım ki, Ermənistan hökuməti hərbi xərclərin artımını dondurur, bu şəraitdə ümumi dövlət büdcəsinin 2020-ci ildə 14% artımı proqnozlaşdırılır və düşmənin gərginləşən döyüş ritorikası şəraitində müdafiə xərclərinin ən azı mütənasib artımı zərurətdir.
Oktyabrın 18-də Azərbaycanın 2020-ci ildə dövlət büdcəsi lahiyəsi nəşr olunub. Ümumi dövlət büdcəsi xərclərinin 1,7% artmasına baxmayaraq, müdafiə büdcəsi 20,9% artaraq 2,267 milyard ABŞ dollarına çatır. Bu məbləğdən 945 milyon dolları silahların alınması və hərbi sənaye sərmayələri üçün planlaşdırılır.
Bu şəraitdə Ermənistan hökumətinin təqdim etdiyi 2020-ci il dövlət büdcəsi lahiyəsi ən azından çaşqınlıq yaradır. Mən bəzi mötərizələri açmaq məcburiyyətində qaldım”, - deyə Çalabyan qeyd edib.
Alpər Mövludoğlu
Ordu.az
