Ordu.az xəbər verir ki, Malayziyanın müdafiə naziri Datuk Seri Mohamed Xalid Nordin “Labuan” Hərbi Hava Bazasında keçirilən ANKA-S təhvil mərasimində çıxışı zamanı mövcud parka daha üç ANKA-nın əlavə edilməsinin nəzərdən keçirildiyini açıqlayıb.
Bu tədarükün həyata keçirilməsi halında Malayziya Kral Hərbi Hava Qüvvələrinin ANKA parkı iki dəfə artmış olacaq.
Məqsəd ölkə üzrə fasiləsiz müşahidə imkanının yaradılmasıdır
Datuk Seri Mohamed Xalid Nordin bildirib ki, əlavə ANKA tədarükü mövcud Malayziya Planına daxildir və bu sistemlər ölkə üzrə əməliyyat əhatə dairəsini əhəmiyyətli dərəcədə genişləndirəcək.
“İkinci mərhələ çərçivəsində daha üç ANKA-nın alınması ilə bağlı təklifimiz var. Hazırda iki hava aparatından növbəli şəkildə istifadə edirik. Daha üç sistem silahlanmaya daxil olarsa, ölkənin bütün ərazisini əhatə edə biləcək müşahidə şəbəkəsi yarada bilərik”, - deyə nazir bildirib.
İlk ANKA-S parkı 2023-cü ildə sifariş edilmişdi
Malayziya üç ədəd ANKA-S, yerüstü idarəetmə stansiyaları və təlim paketlərini əhatə edən müqaviləni 2023-cü ildə Langkavi Beynəlxalq Dənizçilik və Aviasiya Sərgisində (LIMA) imzalayıb.
Ümumi dəyəri 423,8 milyon Malayziya rinqiti olan proqram çərçivəsində təhvil verilən ANKA-S sistemləri Malayziya Kral Hərbi Hava Qüvvələrinin pilotsuz uçuş aparatı imkanlarında mühüm mərhələ hesab olunur.
Cənubi Çin dənizində xidmət göstərəcək
Malayziya Müdafiə Nazirliyi ANKA-S sistemlərini “Labuan” Hərbi Hava Bazasında yerləşdirməyi planlaşdırır. Platformanın xüsusilə Cənubi Çin dənizində müşahidə fəaliyyətləri həyata keçirməsi və Malayziyanın hüquq iddia etdiyi dəniz sahələrində vəziyyət barədə məlumatlılığı artırması nəzərdə tutulur.
Datuk Seri Mohamed Xalid Nordin bildirib ki, ANKA-S ölkənin “gözləri və qulaqları” funksiyasını yerinə yetirəcək və dünyanın ən rəqabətli dəniz bölgələrindən birində Malayziyaya mühüm informasiya üstünlüyü qazandıracaq.
24 saatdan artıq havada qala bilir
ANKA-S 30 min fut yüksəkliyə qədər fəaliyyət göstərə bilir və 24 saatdan artıq havada qalma müddəti təmin edir. Sistem dəniz müşahidəsi, sərhəd təhlükəsizliyi, kəşfiyyat və informasiya toplama tapşırıqlarında istifadə oluna bilir. Uzunmüddətli uçuş qabiliyyəti sayəsində geniş ərazilərin fasiləsiz izlənilməsinə imkan yaradır.
Malayziyanın müdafiə naziri bildirib ki, ANKA-S-nin gəmiləri aşkar etmə və izləmə qabiliyyəti təhlükəsizlik qüvvələrinə mühüm üstünlük verir. “Bu yolla resurslarımızdan daha səmərəli istifadə edə, pozuntu aşkar olunan ərazilərə doğru zamanda və düzgün şəkildə müdaxilə edə bilərik”, - deyə o vurğulayıb.
Silahlı istifadə qabiliyyətinə malikdir
Malayziyalı rəsmilər ANKA-S-nin silah inteqrasiyasına uyğun platforma olduğunu bildirsələr də, mövcud müdafiə siyasətinə uyğun olaraq sistemlərin silahsız şəkildə istifadə ediləcəyini açıqlayıblar.
Datuk Seri Mohamed Xalid Nordin vurğulayıb ki, Malayziyanın müdafiə yanaşması hücuma deyil, ölkənin suverenliyinin qorunmasına yönəlib. Bu səbəbdən ANKA-S ilk növbədə müşahidə və kəşfiyyat tapşırıqlarında istifadə olunacaq.
Sevinc Əliyeva
Ordu.az
