Həmin danışıqların yekunlarına dair yayılan məlumatlardan belə nəticə çıxır ki, “Avropa üçlüyü” və Ukrayna atəşin və bütün növ hərbi əməliyyatların dayandırılması, təmas xəttinin sabitləşdirilməsi və Ukrayna üçün təhlükəsizlik təminatlarının rəsmiləşdirilməsi, o cümlədən “sabitləşdirici qüvvələrin” yerləşdirilməsi məsələlərində razılığa gəliblər. Rusiya Prezidenti Putinin mətbuat katibi Peskov isə bu təklifləri “tamamilə qəbuledilməz” adlandırıb.

“Avropa üçlüyü”nün ABŞ Prezidentini Ukrayna nizamlanmasına dair “London layihəsi”ni dəstəkləməyə razı salıb-salmayacağını yəqin ki, heç kim proqnozlaşdıra bilməz. Fakt budur ki, Rusiyanın xarici işlər naziri Lavrov Vaşinqtondan Trampın kürəkəni Kuşnerin və ABŞ Prezidentinin xüsusi nümayəndəsi Uitkoffun Kiyevə hansı missiya ilə səfər etdiklərinə dair “aydınlaşdırma gözləyir”. Yeri gəlmişkən, onların Moskvaya “yaxın vaxtlarda planlaşdırılan səfərinin tarixi hələ məlum deyil”.

Ukrayna istiqamətində mümkün inkişaflar barədə ümumi təsəvvür əldə etmək üçün Rusiya rəsmi mediasında dərc olunan bir sıra materiallara nəzər salmaq kifayətdir. Həmin yazılarda “qırmızı xətt kimi” belə bir fikir ön plana çıxarılır ki, İrana qarşı müharibə “ABŞ-nin genişmiqyaslı münaqişədən yayınmağa çalışdığını üzə çıxarıb”. “RIA Novosti”nin şərhçisi hətta belə bir qənaət irəli sürüb ki, Tramp administrasiyası “Konqresə aralıq seçkilərə fokuslanıb və müharibə aparmaq istəmir”.

Rəsmi informasiya vasitəsinin müəllifi gizlətmir ki, həmin seçkilərdən sonra ABŞ “Rusiyanın formalaşdıracağı tamamilə yeni bir vəziyyətə qayıda bilər”. Konqresə aralıq seçkilərə isə beş ay qalıb. Görünür, Rusiyada bu müddət başa çatana qədər Ukrayna ilə bağlı “məsələləri həll etmək” qərarına gəliblər. Təbii ki, əgər Donald Tramp “Avropa üçlüyü”nə növbəti dəfə rədd cavabı verər və Rusiya ilə problemləri “öz gücləri hesabına həll etməyi” tövsiyə edərsə…

Asif Cəfərov
Ordu.az