Mersin MSB müdafiə sənayesində sürətli inkişaf nümayiş etdirir - VİDEO
Oxunub: 494
17:36
22 May 2026
Mersin Mütəşəkkil Sənaye Bölgəsinin (MSB) İdarə Heyətinin sədri Sabri Tekli bildirib ki, Mersin son beş ildə müdafiə sənayesinə ciddi maraq göstərən şəhərlərdən birinə çevrilib.
Ordu.az xəbər verir ki, o, bölgədə fəaliyyət göstərən şirkətlərin klasterləşmə fəaliyyəti barədə mühüm açıqlamalar verib.
Tekli qeyd edib ki, Mersində müdafiə sənayesi sahəsində çalışan və xüsusilə milli zavodlara dəstək verən şirkətlərin sayı sürətlə artır.
“Beş ildir müdafiə sənayesinə könül verən şəhərlərdən birinə çevrilmişik. Mersinli iş adamları bu məsələdə çox həvəslidirlər və hər keçən gün sayımız artır”, - deyə o bildirib.
Onun sözlərinə görə, Mersində fəaliyyət göstərən şirkətlərin birgə hərəkəti nəticəsində hazırda müdafiə sənayesi üçün çalışan 38 şirkət formalaşıb.
Tekli bildirib ki, Mersin MSB olaraq SAHA EXPO 2026 sərgisində 15 şirkət öz stendlərində iştirak edir.
“İlk dəfə iştirak etdiyimiz zaman cəmi 7 şirkətimiz var idi. Hazırda 38 şirkətə çatmışıq. Bu, böyük uğurdur”, - deyə o vurğulayıb.
Şirkət rəhbəri qeyd edib ki, hazırda əsasən yardımçı sənaye kimi fəaliyyət göstərsələr də, gələcəkdə daha böyük və daha güclü silah sistemləri hazırlamaq niyyətindədirlər.
“Hazırda ehtiyaclara uyğun istehsal həyata keçiririk. Lakin bu gücləri birləşdirsək, daha böyük və daha güclü silahlarla çıxış edəcəyik”, - deyə Tekli bildirib.
O əlavə edib ki, Mersində klasterləşmə prosesi uğurla davam edir. Tekli həmçinin vurğulayıb ki, onlar yalnız Mersin MSB çərçivəsində deyil, Mersin Ticarət və Sənaye Palatası ilə birlikdə fəaliyyət göstərirlər.
Onun sözlərinə görə, məqsəd bütün Mersini bu sənaye çətiri altında birləşdirməkdir. Tekli qeyd edib ki, Türkiyə Müdafiə Sənayesi Komitəsi və bir sıra qurumlar bu sahədə onlara dəstək verir, təlimlər keçir və istiqamət göstərir.
“Hər keçən il səviyyəmizi daha da yüksəldirik və bu göstəricilər gələcəkdə daha da artacaq”, - deyə o əlavə edib.
