Ordu.az xəbər verir ki, bu barədə “The Washington Post” yazıb.

Söhbət ilk növbədə müharibədən əvvəl Qazaxıstan, Özbəkistan, Türkmənistan və Tacikistan iqtisadiyyatlarına fəal şəkildə sərmayə yatıran Səudiyyə Ərəbistanı, Birləşmiş Ərəb Əmirlikləri və Qətərdən gedir.

2025-ci ilin sonuna olan məlumata görə, belə investisiyaların ümumi həcmi 16,2 milyard dollar qiymətləndirilib.

İnvestisiyalar energetika, nəqliyyat, bank sistemi və infrastrukturun inkişafına yönəldilib.

Əsas layihələr arasında Qətərin “Lesha Bank”ı tərəfindən Qazaxıstanın “Bereke Bank”ının 134 milyon dollara alınması, “ACWA Power” şirkətinin regional enerji layihələrinə yatırımları, həmçinin külək və günəş elektrik stansiyalarının tikintisində əmirlik fondlarının iştirakı yer alır.

Bununla belə, müharibə və dünya üzrə neft və mayeləşdirilmiş təbii qaz tədarükünün təxminən 20%-ni təmin edən Hörmüz boğazında gəmiçiliyin pozulması Körfəz ölkələrinin maliyyə vəziyyətini ciddi şəkildə pisləşdirib.

“Goldman Sachs” proqnozlaşdırır ki, məhdudiyyətlər davam edərsə, Qətər və Küveytdə ÜDM azalması 14%-ə qədər çata bilər, halbuki BƏƏ və Səudiyyə Ərəbistanında bu göstərici müvafiq olaraq 5% və 3% olacaq.

BMT İnkişaf Proqramının (UNDP) məlumatına görə, region iqtisadiyyatına dəyən ümumi zərər 120-194 milyard dollar arasında dəyişə bilər.

Bu fonda Körfəz ölkələrinin təxminən 5 trilyon dollarlıq aktivləri idarə edən suveren fondları vəsaitləri daxili ehtiyaclara, yəni infrastrukturun bərpasına, müdafiənin gücləndirilməsinə və milli iqtisadiyyatların dəstəklənməsinə yönəltməyə başlayıb.

Nəticədə xarici layihələrin bir hissəsi təxirə salına və ya ixtisar edilə bilər.

Ən həssas sahələr Mərkəzi Asiyada həyata keçirilən investisiyalar hesab olunur, çünki prioritet daxili xərclərə və Qərbdə strateji investisiyalara verilir.

Analitiklər proqnozlaşdırırlar ki, qısamüddətli perspektivdə regionda Körfəz kapitalının axını zəifləyə bilər, lakin strateji baxımdan Mərkəzi Asiya investorların diqqət mərkəzində qalacaq.

Sevinc Əliyeva
Ordu.az