Ordu.az xəbər verir ki, PURL təşəbbüsü çərçivəsində təqdim olunacaq paketin xüsusilə Rusiyanın intensivləşən hava hücumları qarşısında Ukraynanın kritik infrastrukturunu və şəhərlərini qorumağa yönəldiyi bildirilib.
Ukrayna Müdafiə Nazirliyinin açıqlamasında maliyyənin hava hücumundan müdafiə sistemləri, önləyici sursat və əlaqədar müdafiə ehtiyaclarının təmin edilməsində istifadə ediləcəyi qeyd olunub. Norveçin digər tərəfdaş ölkələrlə koordinasiya apararaq paketin miqyasını genişləndirmək üçün əlavə maliyyə yaratmağı da hədəflədiyi bildirilib.
“Patriot” qabiliyyəti və önləyici pilotsuz uçuş aparatı dəstəyi gündəmdə
Ukrayna müdafiə naziri Mixaylo Fedorov Osloda keçirdiyi təmaslarda Norveçin göstərdiyi dəstəyin əhəmiyyətinə diqqət çəkib. Fedorov xüsusilə “Patriot” hava hücumundan müdafiə sistemlərinin gücləndirilməsi və önləyici pilotsuz uçuş aparatı tədarükünə dair qərarlar səbəbindən Norveçin Baş naziri Yonas Qar Störe-yə təşəkkür edib.
Görüşlərdə Ukrayna tərəfi hava, quru və iqtisadi sahələri əhatə edən müdafiə strategiyasında əldə olunan irəliləyişlər barədə məlumat verib, həmçinin tərəfdaş ölkələrdən gələn dəstəyin sürətli və şəffaf şəkildə əməliyyat qabiliyyətinə çevrilməsi istiqamətində görülən işlər müzakirə olunub.
PURL təşəbbüsü və uzun mənzilli sursat dəstəyi
Norveçli rəsmilərlə keçirilən görüşlərdə üç əsas əməkdaşlıq sahəsi ön plana çıxıb:
PURL təşəbbüsü çərçivəsində hava hücumundan müdafiənin gücləndirilməsi,
Çex Təşəbbüsü çərçivəsində uzun mənzilli sursat tədarükü,
Pilotsuz uçuş aparatı istehsalı qabiliyyətinin artırılması.
Ukrayna nümayəndə heyəti həmçinin Norveçin maliyyə naziri Yens Stoltenberq və müdafiə naziri Tore O. Sandvik ilə də görüşüb. Danışıqlarda həm Ukraynanın, həm də Norveçin müdafiə qabiliyyətlərini artırmağa yönələn konkret addımlar nəzərdən keçirilib.
NASAMS və müdafiə texnologiyaları üzrə əməkdaşlıq
Fedorovun təmasları çərçivəsində Norveçin müdafiə şirkəti “Kongsberg Gruppen” rəhbərləri ilə də görüşlər keçirilib. Şirkətin baş direktoru Eirik Lienin iştirakı ilə keçirilən görüşlərdə NASAMS hava hücumundan müdafiə sistemlərinin qabiliyyətinin artırılması və qış mövsümündən əvvəl raket tədarükünün təmin olunması məsələləri müzakirə olunub.
Tərəflər həmçinin aşağıdakı sahələrdə birgə texnologiya inkişafı layihələrini dəyərləndiriblər:
Ballistik raketlərin qarşısının alınması
İnteqrasiya olunmuş hava hücumundan müdafiə arxitekturaları
İnsansız sistemlər
Sursat istehsalı
Kosmik texnologiyalar
“Shahed” tipli pilotsuz uçuş aparatı hücumlarına qarşı qarşısının alınma faizi artıb
Ukrayna Müdafiə Nazirliyinin paylaşdığı məlumatlara görə, ilin əvvəlindən etibarən düşmən pilotsuz uçuş aparatlarının qarşısının alınma faizi 81 faiz səviyyəsindən 87-89 faiz aralığına yüksəlib. Bu artımın “Shahed” tipli kamikadze pilotsuz uçuş aparatı hücumlarında təxminən 1,5 dəfə artım olmasına baxmayaraq əldə edildiyi bildirilib.
Ukrayna tərəfi həmçinin Rusiya qüvvələrinə vurulan itkilərin də artdığını iddia edib. Açıqlamaya görə, ağır itki verən Rusiya əsgərlərinin sayı avqust ayında 15 min səviyyəsində ikən mart və aprel aylarında 35 minə çatıb. Kiyev rəhbərliyi aylıq 50 min şəxsi heyət itkisi hədəfi istiqamətində əməliyyatların davam etdirildiyini bildirib.
NORDEFCO ölkələri ilə texnologiya tərəfdaşlığı
Fedorov İsveç, Norveç, Danimarka, Finlandiya və İslandiya nümayəndələrinin iştirak etdiyi NORDEFCO toplantısında da Ukraynanın döyüş meydanında əldə etdiyi əməliyyat təcrübələrini tərəfdaş ölkələrlə paylaşmağa hazır olduğunu deyib.
Ukrayna tərəfi müharibə şəraitində sınaqdan keçirilmiş texnologiyaların daha genişmiqyaslı müdafiə texnologiyası tərəfdaşlığı çərçivəsində Avropa ölkələri ilə birgə inkişaf etdirilə biləcəyini vurğulayıb.
Sevinc Əliyeva
Ordu.az
