Ordu.az xəbər verir ki, ABŞ Müharibə Nazirliyi tərəfindən 2026-cı il aprelin 30-da açıqlanan razılaşmanın ilkin dəyəri 325,9 milyon dollar təşkil edir və ümumi proqramın 650 milyon dollara qədər çata biləcəyi bildirilib.
474 ədədə qədər qayıq təchiz ediləcək
“Naval Sea Systems Command” tərəfindən icra olunan proqram çərçivəsində ümumilikdə 474 ədədə qədər RHIB qayığın təchiz edilməsi planlaşdırılır. Tender prosesinə 15 təklifin təqdim olunduğu və müqavilənin rəqabətli üsulla həyata keçirildiyi bildirilib.
İlk təhvilin 2026-cı il iyul ayından etibarən başlanması nəzərdə tutulur. Proqramın qısa müddətdə donanmanın hazırlıq səviyyəsini artıracağı, uzunmüddətli perspektivdə isə kiçik dəniz vasitələri imkanlarını mərhələli şəkildə genişləndirəcəyi qeyd olunur.
Səkkiz fərqli istehsalçı iştirak edəcək
Müqavilə çərçivəsində istehsal işləri ABŞ üzrə fəaliyyət göstərən səkkiz şirkət tərəfindən həyata keçiriləcək. Bu şirkətlər arasında ASIS “Boats USA”, “Brig” USA, “Ghostworks Marine”, “Ribcraft” USA, “St. Johns Ship Building”, “Structural Composites”, “United States Marine Inc.” və “The Whiskey Project Group” yer alır.
İstehsalın müxtəlif coğrafi bölgələrdə həyata keçirilməsi təchizat zəncirinin dayanıqlığını artırmağı və davamlı istehsal gücü formalaşdırmağı hədəfləyir.
Sahil əməliyyatları üçün yüksək manevr qabiliyyəti
Kompozit gövdəli RHIB qayıqları yüksək sürət, manevr qabiliyyəti və dayaz sularda fəaliyyət imkanları ilə seçilir. Sərt gövdə və şişmə yan quruluşun birləşməsi həm davamlılıq, həm də zərbə udma qabiliyyəti təmin edərək çətin dəniz şəraitində sabitlik yaradır.
Saatda 40 knotdan artıq sürətə çata bilən bu platformalar dəniz təhlükəsizliyi, xüsusi qüvvələrin daşınması, axtarış-xilasetmə, liman təhlükəsizliyi və dənizdə nəzarət əməliyyatlarında istifadə olunur.
Modul quruluşu sayəsində radar, rabitə sistemləri və silah stansiyaları ilə təchiz edilə bilən qayıqlar müxtəlif tapşırıqlara uyğun yenidən konfiqurasiya edilə bilir.
Paylanmış dəniz əməliyyatları konsepsiyasına uyğun
Proqramın ABŞ Hərbi Dəniz Qüvvələrinin son illərdə tətbiq etdiyi “paylanmış dəniz əməliyyatları” yanaşmasının bir hissəsi olduğu qiymətləndirilir. Bu konsepsiya daha kiçik və sürətli platformalarla geniş ərazidə mövcudluğu təmin edərək əməliyyat elastikliyini artırmağı hədəfləyir.
RHIB qayıqlarının sayının artırılması ilə xüsusilə sahil və dar su hövzələrində daha effektiv patrul, müdaxilə və çəkindirmə imkanlarının təmin edilməsi planlaşdırılır.
Sevinc Əliyeva
Ordu.az
