Ordu.az “The Guardian”a istinadən xəbər verir ki, onların təxminən 60 faizi qaradərililər və ya qadınlar olub.
Nəşr yazır ki, bu yanaşma administrasiyanın DEI – müxtəliflik, bərabərlik və inklüzivlik prinsipləri ilə aparılan kadr siyasətinə qarşı elan etdiyi mübarizə ilə əlaqələndirilir.
Bildirilib ki, vəzifədən uzaqlaşdırılan zabitlərin reputasiyası qüsursuz olub.
Ən son belə hallardan biri quru qoşunlarının qərargah rəisi general Rendi Corcun işdən çıxarılması olub. O, ötən ay Heqsetin mümkün yüksəlişlər siyahısından iki qaradərili kişi və iki qadın olmaqla dörd zabitin adının çıxarılması barədə əmrini yerinə yetirməkdən imtina etdikdən sonra vəzifədən uzaqlaşdırılıb.
İşdən çıxarılmalar dalğası ötən ilin fevralında Birləşmiş Qərargah Rəisləri Komitəsinin sədri general K.K. Braunun istefası ilə başlayıb.
Qaradərili və Hərbi Hava Qüvvələrinin seçilən keçmiş komandiri olan Braun həmin postda Den Keyn ilə əvəzlənib.
Nəşr qeyd edir ki, üçulduzlu general olan və təqaüdə çıxmış Keyn həmin vəzifə üçün Senat təsdiqi almaq məqsədilə zəruri olan dördüncü ulduzu alması üçün sürətlə irəli çəkilməli idi. Bəzi müşahidəçilər onun bu vəzifə üçün yetərli keyfiyyətə malik olmadığını düşünürlər.
İşdən çıxarılan qadın zabitlər arasında Hərbi Dəniz Əməliyyatlarına rəhbərlik edən ilk qadın və Birləşmiş Qərargah Rəisləri Komitəsinə daxil edilən ilk qadın admiral Liza Françetti də olub.
Ötən həftə Senatın Silahlı Qüvvələr Komitəsində keçirilən dinləmələr zamanı Heqset sərt mövqe nümayiş etdirib. Rod-Aylenddən demokrat Cek Rid ondan Trampın qaradərili zabitlərin və qadınların işdən çıxarılması barədə göstəriş verib-vermədiyini soruşub.
“The Guardian”a danışan mənbələr “Fox News”un keçmiş aparıcısı olan Heqseti Pentaqonun “şişmiş” bürokratiyasında getdikcə daha çox təcrid olunmuş və yaxın dostları ilə qohumlarından ibarət kiçik çevrənin əhatəsində olan şəxs kimi xarakterizə ediblər.
Bəzi mənbələr bildiriblər ki, o, Trampın onu vəzifədən uzaqlaşdıracağı fikrindən qorxu və paranoya keçirir.
Tənqidçilərin fikrincə, İraq və Əfqanıstanda döyüş təcrübəsi olan keçmiş milli qvardiya piyada mayoru Heqset tutduğu vəzifə üçün kifayət qədər ixtisaslı deyil.
Nəşrin məlumatına görə, Pentaqon əməkdaşları rəsmi görüşlərdə onun həyat yoldaşı Cenniferin – “Fox News”un keçmiş prodüserinin də iştirak etməsinə təəccübləniblər. Bildirilir ki, o, bu cür görüşlər zamanı çox vaxt zalın arxa hissəsində əyləşir.
Heqsetin yaxın çevrəsinə onun böyük müşaviri təyin etdiyi qardaşı Fil, əvvəllər həm Heqsetin, həm də Trampın maraqlarını təmsil etmiş vəkil Tim Parlator və keçmiş dəniz piyadası, Bayden administrasiyasının nümayəndəsi Riki Buriya da daxildir.
Təxminən 2,1 milyon hərbçi və 770 min mülki qulluqçusu olan bu nəhəng qurumun gündəlik idarəetmə işlərinin böyük hissəsini müdafiə nazirinin müavini, milyarder və investisiya şirkəti sahibi Stiv Faynberq həyata keçirir.
Bu arada Heqset daha çox şəxsi maraq kəsb edən məsələlərə diqqət ayırıb.
Bunlardan biri də Pentaqonda hərbi kapellan xidmətinin yenidən qurulmasıdır. Bu addım onun geniş tanınan xristian baxışlarına uyğundur. Bildirilir ki, o, tez-tez “Kristos kraldır” çağırışı ilə çıxış edir.
Hərbi analitiklər hesab edirlər ki, Heqsetin son işdən çıxarmaları “Heritage Foundation”un hazırladığı radikal “Project 2025” proqramında əksini tapan planlarla uzlaşır.
Qeyd olunub ki, bu sənəd Trampın ikinci prezidentlik dövrünün siyasətinə ciddi təsir göstərib.
Sevinc Əliyeva
Ordu.az
