Ordu.az xəbər verir ki, bu barədə “Associated Press” məlumat yayıb.
Minnesota ştatının Farminqton şəhərindən Zak Loud kimi insanlar üçün yeni qanunla Kanadanın onu və bacı-qardaşlarını artıq vətəndaş hesab etdiyini öyrənmək gözlənilməz olub, çünki onların nənəsi kanadalıdır.
Dekabrın 15-də yeni qanun qüvvəyə mindikdən bəri ABŞ və Kanadada immiqrasiya hüquqşünasları bildirirlər ki, vətəndaşlığın təsdiqi sənədləri üçün müraciət edən müştərilərin çoxluğu səbəbindən həddindən artıq yükləniblər.
Siyasi motivlər, ailə irsi, iş imkanları və digər amillərlə hərəkət edən minlərlə amerikalı düşünür ki, bu sadələşdirilmiş proses ikili vətəndaşlıq almaq üçün münasib vaxtdırmı?
İmmiqrasiya hüquqşünası Amandip Heyer bildirib ki, Vankuverdə fəaliyyəti ildə təxminən 200 vətəndaşlıq işindən gündə 20-dən çox məsləhətləşməyə yüksəlib.
Kanada onilliklər ərzində istər qanunun tarixi şərhlərini yeniləmək, istərsə də ayrı-seçkilik problemlərini həll etmək məqsədilə vətəndaşlıq haqqında qanunlarını dəyişib.
Əvvəllər Kanada vətəndaşlığı mənşəyə görə yalnız bir nəsil üzrə, valideyndən uşağa ötürülə bilərdi. Vəziyyət dekabrın 15-də qüvvəyə minən Kanada C-3 qanunu ilə dəyişib. Bu qanun həmin tarixədək doğulan və birbaşa kanadalı əcdadının, yəni baba, ulu baba və ya daha uzaq nəslin nümayəndəsinin olduğunu sübut edə bilən hər kəs üçün vətəndaşlıq qapısını açıb.
Dekabrın 15-də və ya ondan sonra doğulanlar isə valideynlərinin ölkədə 1095 gün yaşamaq tələbinə əməl etdiyini təsdiqləyən sənədlər təqdim etməlidirlər.
Yeni qanuna əsasən, kanadalıların nəslindən olanlar artıq vətəndaş hesab olunurlar, lakin vətəndaşlıq şəhadətnaməsi almaq üçün sübutlar təqdim etməlidirlər.
Hazır sənədləri olanlar üçün vətəndaşlığın təsdiqi rüsumu nisbətən ucuzdur, 75 Kanada dolları (55 ABŞ dolları) təşkil edir. Lakin vəkil və ya şəcərə mütəxəssisinin xidmətinə müraciət edənlər üçün xərclər artacaq.
Kanadanın İmmiqrasiya, Qaçqınlar və Vətəndaşlıq İdarəsinin saytında qeyd olunur ki, şəhadətnamənin alınma müddəti təxminən 10 aydır və 56 mindən çox insan qərar gözləyir. Qurum bildirib ki, dekabrın 15-dən yanvarın 31-dək olan müddətdə 1480 nəfərin mənşəyə görə vətəndaşlığı təsdiqlənib, halbuki onların hamısı amerikalı olmayıb. Keçən il 24 min 500 amerikalı ABŞ və Kanada ikili vətəndaşlığı alıb.
Sevinc Əliyeva
Ordu.az
