Ordu.az xəbər verir ki, bunu iranlı siyasi analitik Ehsan Mohavedian deyib.

Onun sözlərinə görə, Tramp İranın dünyanın dördüncü supergücü kimi ortaya çıxması faktını qəbul edib.

“Tramp İrana 15 maddədən ibarət plan təklif etdi. İran bunu rədd etdi və əvəzində özünün 10 maddəlik planını təqdim etdi, Tramp da bunu qəbul etdi. Çünki o, ABŞ-də müharibənin vurduğu zərərdən, benzinin qiymətinin artmasından, yüzlərlə amerikalının ölümündən, İrana qarşı quru müdaxiləsi planının iflasından və Hörmüz boğazını yenidən açmaq iqtidarında olmamasından qorxurdu. O, indi müharibədən əvvəl ümumiyyətlə mövcud olmayan bir böhranı həll etməyə çalışır: Hörmüz boğazının bağlanması, neft qiymətlərinin artması və dünyada helium, gübrə, neft-kimya məhsulları və polad qıtlığı”, - deyə Mohavedian qeyd edib.

Mohavedian bildirib ki, erməni xalqı, eləcə də ölkənin bəzi siyasi partiyaları İrana güclü dəstək göstəriblər.

“Ancaq Ermənistan hökuməti “Amerika cinayətləri”ni pisləmədi və sadəcə təəssüf ifadə etdi, o, İrana müəyyən yardım göstərdi və xoşbəxtlikdən ikitərəfli ticarət ciddi zərər görmədi. Bununla belə, İranda gözlənti var idi ki, Ermənistan hökuməti daha aydın mövqe ortaya qoyacaq və ABŞ ilə İsrailin “amansız təcavüzü”nü pisləyəcək. Əgər Ermənistan İranla sabit münasibətlər istəyirsə, o zaman anlamalıdır ki, son müharibədən sonra İran “Tramp marşrutu”nu və Zəngəzur dəhlizini yaratmağa yönəlmiş ABŞ səylərinə dözməyəcək.

“Tramp marşrutu” Ermənistana heç bir iqtisadi fayda vermir. O, yalnız ölkəni rəqib dövlətlərlə əhatə edəcək və İran-Ermənistan sərhədini təhlükə altına salacaq. İran bu sərhədləri qorumağa və öz geosiyasi və dəhliz mövqeyini zəiflətməyə yönəlmiş istənilən cəhdə qarşı çıxmağa sadiqdir və Ermənistan hökumətinin bu mühüm məsələni anlayacağını, əvvəlki kimi birgə dəhliz və iqtisadi layihələrə sərmayə qoymaqla ikitərəfli münasibətləri gücləndirəcəyini gözləyir”, - deyə o bildirib.

Alpər Mövludoğlu
Ordu.az