Ordu.az xəbər verir ki, yaxın günlərdə keçirilən məşqdən əldə edilən görüntülərdə PUA-ların zirehli K-5350 kabinli “KamAZ-6350” hərbi yük maşınına yerləşdirilmiş vəziyyətdə Moskvaya yaxın hərbi hava limanından keçdiyi müşahidə olunub.
İran istehsalı olan və “Shahed” seriyasına daxil edilən bu döyüş sursatı – “Geran-2” – 2022-ci ilin sonlarından etibarən Rusiya tərəfindən döyüş bölgələrində istifadə olunmağa başlayıb və ölkənin uzun mənzilli zərbə imkanlarının əsas elementlərindən birinə çevrilib.
Rusiya bu pilotsuz aparatların yerli istehsal olduğunu bildirsə də, müdafiə analitikləri və Qərb ölkələrinin hökumətləri “Geran-2”nin dizayn və texniki xüsusiyyətlərinin İranın “Shahed-136” modeli ilə tam eyni olduğunu təsdiqləyiblər.
Açıq mənbəli kəşfiyyat məlumatlarına əsasən, İran bu sistemləri hissə şəklində Rusiyaya göndərir. Bu isə Rusiyaya onları yerli şəkildə yığmağa və sanksiyalardan, həmçinin texnoloji izləmə mexanizmlərindən yayınmağa imkan verir.
“Shahed-136” bir istiqamətli hücumlar üçün nəzərdə tutulub və yüzlərlə kilometr məsafədə yerləşən infrastruktur hədəflərini vurmağa qadir yüksək partlayıcı döyüş başlığına malikdir. Ukraynalı rəsmilər dəfələrlə bu pilotsuz aparatların mülki ərazilərə qarşı istifadəsini qınayıb, onların enerji infrastrukturlarına və şəhər mərkəzlərinə qarşı həyata keçirilən genişmiqyaslı hücumlarda mühüm rol oynadığını bildiriblər.
Bu PUA-ların nisbətən aşağı maya dəyəri və GPS yönləndirməsi ilə yüksək dəqiqliklə hədəfləri vurmaq bacarığı, onları xüsusilə hərbi əməliyyatların intensiv dövrlərində ardıcıl hücumlar üçün cəlbedici edir.
Sovet İttifaqının İkinci Dünya Müharibəsində nasist Almaniyasına qarşı qazandığı qələbənin anıldığı Qələbə Günü uzun illərdir ki, Rusiya rəhbərliyi tərəfindən ölkənin hərbi gücünü və texnoloji bacarıqlarını nümayiş etdirmək üçün əsas platformalardan biri olaraq istifadə edilir.
Sevinc Əliyeva
Ordu.az
