Tramp məktubunu Birləşmiş Ərəb Əmirlikləri vasitəsilə göndərmişdi, İran isə Oman variantını seçdi. Cavabın detalları məlum deyil. İran rəsmiləri ABŞ ilə birbaşa danışıqlara qarşı olduqlarını, lakin dolayı danışıqlara hazır olduqlarını bildirirlər. Dolayı danışıqların nə demək olduğu dəqiq deyil. Vasitəçilik həm texniki, həm də məzmun baxımından ola bilər və vasitəçi müəyyən mənada tərəf kimi də çıxış edə bilər.

ABŞ və İran arasında dialoqun inkişaf etməsi, yoxsa qarşıdurmanın dərinləşməsi gözlənilir. Bu məsələ bölgəmizdə diqqət çəkir, çünki İran-ABŞ münasibətlərinin gərginləşməsi Qafqazın təhlükəsizlik mühitinə təsir göstərə bilər. Digər tərəfdən, müsbət gedişat İrana qarşı sanksiyalar yumşalarsa, ölkəmiz üçün də yeni iqtisadi imkanlar aça bilər.

Bununla yanaşı, bu prosesin bəzi oyunçular üçün arzuolunmaz olması da müəyyən risklər yarada bilər. İran-ABŞ münasibətlərində konstruktiv atmosfer regionda birbaşa iddiaları olan ölkələr, eləcə də Avropa İttifaqı kimi geosiyasi iddiaları olan oyunçular üçün məhdudlaşdırıcı ola bilər.

Rusiyanın və Çinin münasibəti ayrıca maraq doğurur, çünki onlar İranın müqavilə tərəfdaşlarıdır. Rusiya prezidenti Putin iki gün əvvəl Dövlət Dumasına İranla strateji hərtərəfli tərəfdaşlıq müqaviləsini təqdim edib. Həftələr əvvəl “Reuters” Trampın Putindən İranla nüvə anlaşmasında vasitəçilik etməsini istədiyini bildirmişdi. Həm Ağ Ev, həm də Kreml bu məlumatı təsdiqləməyib, lakin təkzib də etməyib. Tehran dolayı danışıqlara hazır olduğunu bildirəndə, bu, Rusiyanın vasitəçiliyini qəbul etdiyini göstərə bilərmi?

Asif Cəfərov
Ordu.az