Ordu.az xəbər verir ki, mərasim Çinin Haynan adasındakı Sanya şəhərində baş tutub.
Tədbirdə Pakistan Prezidenti Asif Əli Zərdari və yüksəkvəzifəli Çin rəsmiləri iştirak ediblər. Mərasimin Çində keçirilməsi iki ölkə arasında strateji tərəfdaşlığın göstəricisi kimi qiymətləndirilib.
Məlumata görə, “Hangor” sinfinə məxsus sualtı qayıqlar Pakistan Hərbi Dəniz Qüvvələrinin imkanlarını əhəmiyyətli dərəcədə artıracaq. Dördüncü nəsil platforma yüksək gizlilik, uzunmüddətli fəaliyyət və mürəkkəb əməliyyat şəraitində effektiv istifadə üçün nəzərdə tutulub.
Yeni sualtı qayıqlar Pakistanın dəniz sərhədlərinin və strateji iqtisadi layihələrinin, o cümlədən Çin-Pakistan İqtisadi Dəhlizi və Qvadar limanının təhlükəsizliyinin təmin edilməsində mühüm rol oynayacaq.
“Hangor” adı Pakistan Hərbi Dəniz Qüvvələrinin tarixində xüsusi yer tutur. İlk PNS Hangor sualtı qayığı 1971-ci il Hindistan-Pakistan müharibəsi zamanı Hindistanın INS Khukri freqatını batıraraq böyük şöhrət qazanmışdı. Bu hadisə İkinci Dünya müharibəsindən sonra döyüş şəraitində bir sualtı qayığın hərbi gəmini batırdığı ilk hadisə kimi tarixə düşüb.
Yeni PNS/M Hangor həmin ənənənin davamçısı hesab olunur və səssiz fəaliyyət, yüksək gizlilik və dəqiq zərbə imkanları ilə seçilir.
Texniki baxımdan platforma Pakistan donanması üçün mühüm yenilik hesab edilir. Təxminən 75-80 metr uzunluğa və 2800 ton subasımı qabiliyyətinə malik olan sualtı qayıq hazırda istismarda olan Agosta 90B sinfinə məxsus platformalardan daha böyükdür.
Sualtı qayığın əsas üstünlüklərindən biri havadan asılı olmayan hərəkət sistemi ilə təchiz edilməsidir. Bu texnologiya platformanın həftələrlə suyun altında qalmasına və dizel-elektrik sualtı qayıqlarında olduğu kimi tez-tez üzə çıxmağa ehtiyac duymamasına imkan verir.
Platforma həmçinin qabaqcıl sonar sistemləri, uzaqmənzilli aşkarlama vasitələri və müasir optik müşahidə avadanlıqları ilə təchiz olunub.
Pakistan tərəfi hesab edir ki, yeni platforma ölkənin dənizdə çəkindirmə imkanlarını gücləndirəcək və Hind okeanında strateji balansın qorunmasına töhfə verəcək.
Sevinc Əliyeva
Ordu.az
