Ordu.az xəbər verir ki, Tramp bu barədə “Fox News” telekanalına müsahibəsində danışıb.

Onun sözlərinə görə, amerikalı müfəttişlər gələcəkdə Atom Enerjisi üzrə Beynəlxalq Agentliyin İrana göndəriləcək missiyalarında iştirak edəcəklər. Bu missiyaların məqsədi yüksək səviyyədə zənginləşdirilmiş uran ehtiyatlarını axtarmaq və qiymətləndirməkdir. Tramp bildirib ki, həmin materiallar yerin dərin qatlarında yerləşir.

“Hazırda müfəttişlərin göndərilməsi məsələsində tələsməyə ehtiyac yoxdur”, - deyə Tramp teleaparıcı Trey İnqstiyə bildirib.

ABŞ Prezidenti əlavə edib ki, ehtimal olunan uran anbarının yerləşdiyi obyekt ABŞ-nin B-2 bombardmançı təyyarələrinin zərbələrindən sonra dağıntılar altında qalıb. O, “Gecəyarısı çəkici” adlandırdığı əməliyyat nəticəsində baş verənləri yeraltı materialın üzərinə dağın çökməsi kimi xarakterizə edib.

Trampın sözlərinə görə, ABŞ obyektin ciddi zərər gördüyünü hesab edir və dərinlikdə baş vermiş dağıntılar səbəbindən materiallara çıxış hazırda xeyli çətinləşib.

Sevinc Əliyeva
Ordu.az