Ordu.az xəbər verir ki, bu barədə ABŞ Müdafiə Təhlükəsizlik Əməkdaşlığı Agentliyi məlumat yayıb.

Xarici Hərbi Satışlar proqramı çərçivəsində həyata keçiriləcək paketin ümumi dəyərinin 330 milyon dollar olduğu açıqlanıb.

Satış paketi çərçivəsində Braziliyanın 100 ədəd FIM-92K “Stinger Block I” raketi, buraxılış qurğuları, mühəndis dəstəyi, inteqrasiya xidmətləri, texniki və logistika təminatı əldə etməsi nəzərdə tutulur.

ABŞ Dövlət Departamenti bildirib ki, bu satış Braziliyanın milli təhlükəsizliyinə töhfə verəcək və ölkənin hava hücumundan müdafiə imkanlarını gücləndirəcək.

Məlumata görə, sistemlər Braziliyanın mövcud və gələcək təhlükələrə qarşı mübarizə qabiliyyətini artıracaq, həmçinin müdafiə modernləşdirmə proqramına dəstək verəcək.

Vaşinqton həmçinin qeyd edib ki, “Stinger” sistemləri Cənubi Amerika hava məkanında qanunsuz qaçaqmalçılıq fəaliyyətlərinə qarşı əməliyyatları da dəstəkləyəcək.

Braziliya 2010-cu ildə Rusiyadan 300 ədəd 9K338 “Igla-S” daşınan hava hücumundan müdafiə sistemi almışdı. Yeni “Stinger” tədarükünün ölkənin qısamənzilli hava hücumundan müdafiə arsenalında Qərb istehsalı sistemlərə keçid prosesinin mühüm hissəsi ola biləcəyi qeyd edilir.

ABŞ tərəfi vurğulayıb ki, planlaşdırılan satış Cənubi Amerikadakı hərbi balansı dəyişdirməyəcək. Müqavilənin əsas icraçıları “RTX Corporation” və “Lockheed Martin” şirkətləri olacaq.

FIM-92 “Stinger” aşağı hündürlükdə uçan təyyarələrə, helikopterlərə və pilotsuz uçuş aparatlarına qarşı istifadə olunan daşınan qısamənzilli hava hücumundan müdafiə sistemidir. Modernləşdirilmiş FIM-92K “Block I” versiyası isə daha inkişaf etmiş nişanalma və izləmə imkanları ilə seçilir.

Sevinc Əliyeva
Ordu.az