Ordu.az xəbər verir ki, bu barədə “The Guardian” nəşri Vindzor ərazisində yerləşən “Royal Lodge” malikanəsi ilə bağlı hesabatın dərc olunmasına istinadən məlumat yayıb.
Milli Audit İdarəsinin məlumatına görə, Endryu Mauntbatten-Vindzor malikanənin ərazisində yerləşən üç kottecin subicarəsindən gəlir əldə edib. Bununla yanaşı, onun əsas obyekt üçün ödədiyi icarə haqqının məbləği rəsmi şəkildə açıqlanmayıb.
Hesabat parlamentin Dövlət Hesabları Komitəsinin araşdırması çərçivəsində hazırlanıb. Araşdırma Yorkun keçmiş hersoqunun yaşayış şəraiti ilə bağlı ictimai tənqidlərdən sonra başlanıb. Bildirilir ki, o, əvvəllər “Royal Lodge” malikanəsini simvolik məbləğ qarşılığında icarəyə götürmək hüququndan istifadə edib.
“Republic” təşkilatı bəyan edib ki, “Crown Estate” ilə əlaqəli aktivlərdən bu cür istifadə ictimai mülkiyyətin sui-istifadəsidir. Təşkilat kral ailəsinin maliyyələşdirilməsinin bütün istiqamətləri üzrə daha geniş araşdırmanın aparılmasını tələb edib.
Hesabatda həmçinin qeyd olunub ki, Endryu Mauntbatten-Vindzorun qızları şahzadə Beatris və şahzadə Yevgeniya kral iqamətgahlarında yaşayırlar. Onların yaşayış xərclərinin bir hissəsi Kral III Çarlzın vəsaiti hesabına qarşılanır və təhlükəsizlik tələblərinə uyğunlaşdırılır.
Milli Audit İdarəsinin məlumatına görə, “Crown Estate” təxminən 15 milyard funt sterlinq dəyərində daşınmaz əmlak portfelini idarə edir. Bu aktivlərdən əldə olunan gəlirlər dövlət xəzinəsinə köçürülür və sonradan “Sovereign Grant” mexanizmi vasitəsilə qismən kral ailəsinə qaytarılır.
Tənqidçilər hesab edirlər ki, kral ailəsinə məxsus daşınmaz əmlakların icarə və subicarə sistemi hələ də kifayət qədər şəffaf deyil. Onların fikrincə, dövlət və şəxsi mülkiyyət arasındakı sərhədlərin qeyri-müəyyən olması ictimai nəzarəti çətinləşdirir.
Kral təsərrüfatının nümayəndələri isə bildiriblər ki, daşınmaz əmlakla bağlı bütün əməliyyatlar qüvvədə olan qanunvericiliyə və uzunmüddətli müqavilələrə uyğun şəkildə həyata keçirilir.
Konstitusiya hüququ üzrə ekspertlər vurğulayıblar ki, subicarə təcrübəsi özlüyündə qeyri-adi deyil. Lakin “Crown Estate” obyektləri dövlət statusuna və əldə olunan gəlirlərin ictimai xarakter daşımasına görə daha çox diqqət mərkəzində olur.
Sevinc Əliyeva
Ordu.az
