Ordu.az xəbər verir ki, bu barədə Ermənistan KİV-ləri məlumat yayıb.
Zaxarovaya görə, Moskva vəziyyəti siyasi bəyanatlarla deyil, Ermənistan hökumətinin Avropapərəst siyasətin həyata keçirilməsi ilə bağlı konkret addımları və bunların Avrasiya inteqrasiya proseslərinə mümkün təsiri əsasında qiymətləndirir.
“Birlik üçün, əlbəttə ki, heç bir faciə yoxdur, məsələ yalnız Ermənistanın özündədir”, - deyə Rusiya xarici siyasət qurumunun nümayəndəsi bildirib.
O vurğulayıb ki, xüsusilə başqa bir inteqrasiya birliyi tərəfindən tənzimləyici supramilli mexanizmlərin formalaşdırılması şəraitində Rusiya tərəfi dəfələrlə AİB-ə üzvlük ilə Avropa strukturları ilə inteqrasiyanın dərinləşdirilməsi arasında mövcud ziddiyyətlər barədə xəbərdarlıq edib.
Zaxarovanın sözlərinə görə, Moskva “əvvəldən bildirib ki, AİB-ə üzvlüyü başqa inteqrasiya blokunun supramilli tənzimləyici mexanizmlərinin tətbiqi ilə birləşdirmək mümkün deyil”. O qeyd edib ki, bu mövqe erməni tərəfinə “dəfələrlə və hərtərəfli şəkildə, bütün səviyyələrdə” çatdırılıb.
Rusiya XİN nümayəndəsi xatırladıb ki, bu cür qiymətləndirmələri əvvəllər Rusiya Prezidenti Vladimir Putin və Rusiya baş nazirinin müavini Aleksey Overçuk da səsləndirib.
Zaxarova Rusiya mövqeyini Avropa İttifaqının AİB ölkələrinə qarşı apardığı siyasətlə əlaqələndirib. Onun sözlərinə görə, Avropa strukturları “dağıdıcı siyasət” yürüdür və Avrasiya birliyinə daxil olan dövlətlərə qarşı sanksiya təzyiqi mexanizmlərindən istifadə edir.
“Həmin Qərbi Avropa, yəni Aİ strukturları dağıdıcı xətt götürüblər və məhz AİB üzvü olan dövlətlərə qarşı qanunsuz sanksiyalar tətbiq edirlər”, - deyə o vurğulayıb.
Bu baxımdan, Rusiya XİN nümayəndəsinin fikrincə, Ermənistanın Avropa institutları ilə əməkdaşlığını daha da dərinləşdirməsi AİB çərçivəsində götürülən öhdəliklərlə birbaşa ziddiyyətə gətirib çıxara bilər.
Eyni zamanda Zaxarova vurğulayıb ki, Moskva “ya bu, ya o” prinsipini qəbul etmir və ümumilikdə çoxvektorlu əməkdaşlığa qarşı deyil. Onun sözlərinə görə, Rusiya həmişə “bütün istiqamətlər üzrə qarşılıqlı əlaqənin üzvi şəkildə uzlaşdırılması” imkanından çıxış edib.
Bununla belə, o qeyd edib ki, vəziyyət Qərbi Avropa strukturları tərəfindən, Moskvanın fikrincə, Rusiya və onun tərəfdaşlarının iqtisadiyyatına, ticarətinə və maliyyə sisteminə zərər vuran addımlar atılmağa başlayandan sonra dəyişib.
“Bütün bunlar, o cümlədən ticarət müstəvisində, hibrid müharibəyə çevrilib”, - deyə Zaxarova bildirib və bunu Qərbin sanksiya siyasəti ilə əlaqələndirib.
Alpər Mövludoğlu
Ordu.az
