Ordu.az xəbər verir ki, müqavilə F-35 proqramı tarixində ən böyük modernləşdirmə paketlərindən biri hesab olunur.
ABŞ Hərbi Dəniz Qüvvələrinin Aviasiya Sistemləri Komandanlığı tərəfindən verilən sifariş ABŞ Hərbi Hava Qüvvələri, Hərbi Dəniz Qüvvələri və Dəniz Piyada Korpusu ilə yanaşı, beynəlxalq istifadəçilərə məxsus ümumilikdə 432 ədəd F-35 döyüş təyyarəsini əhatə edir.
Müqaviləyə əsasən, mövcud F-35 platformalarına modernləşdirilmiş radioelektron mübarizə sistemləri və əlavə imkanların inteqrasiyası üçün modifikasiya dəstləri istehsal ediləcək.
Layihənin “Lockheed Martin Aeronautics” şirkətinin Texas ştatının Fort-Uort şəhərində yerləşən müəssisəsində həyata keçiriləcəyi və 2032-ci ilin martında tamamlanacağı bildirilib.
Məlumata görə, modernləşdirmə dəstlərinin bölgüsü ABŞ və beynəlxalq tərəfdaşların proqramdakı rolunu da göstərir.
Belə ki, ABŞ Hərbi Hava Qüvvələri üçün 97, Dəniz Piyada Korpusu üçün 54, Hərbi Dəniz Qüvvələri üçün 42 dəst istehsal olunacaq.
Bundan əlavə, beynəlxalq tərəfdaş ölkələr üçün 133, Xarici Hərbi Satış proqramı çərçivəsində isə 106 dəst hazırlanacaq.
Qeyd olunur ki, beynəlxalq sifarişlərin ümumi həcmi ABŞ qüvvələri üçün nəzərdə tutulan sifarişləri üstələyib və bu, F-35 proqramının müttəfiq ölkələrin hava qüvvələrində nə qədər geniş yayıldığını göstərir.
F-35 platformasında istifadə olunan AN/ASQ-239 radioelektron mübarizə sisteminin təhdid aşkarlanması, hədəf müəyyənləşdirilməsi və koordinat təyini funksiyalarını yerinə yetirdiyi bildirilib.
Qeyd olunub ki, sistem pilotlara radar siqnallarını və raket yönləndirmə siqnallarını əvvəlcədən müəyyən etməyə imkan verir.
Bundan başqa, F-35 düşmənin radar və rabitə sistemlərini qarışdırmaq və ya çaşdırmaq imkanına malikdir.
Ekspertlər hesab edirlər ki, bu modernləşdirmə xüsusilə Çin və Rusiyanın yeni nəsil radar texnologiyalarına qarşı cavab xarakteri daşıyır.
Sevinc Əliyeva
Ordu.az
