Ordu.az xəbər verir ki, müqavilə çərçivəsində sistemin ilk P4 variantlarının təhvilinin 2026-cı ilin yazında həyata keçirilməsi planlaşdırılır.

Şirkət bildirib ki, müqavilə P4 “Transwing” pilotsuz uçuş aparatları, təlim proqramları və davamlı texniki dəstəyi əhatə edir.

Məlumata görə, Avstraliya Kral Donanmasına 2027-ci ildən etibarən daha böyük P5 “Transwing” sistemlərinin alınması üçün əlavə seçim də təqdim olunub.

“PteroDynamics” qeyd edib ki, “Transwing” platformasının əsas xüsusiyyəti qatlanan qanad konstruksiyasıdır.

Bildirilib ki, “şaquli rejimdə” qanadlar qatlanaraq daha az yer tutur və bu, gəmi, nəqliyyat vasitəsi və ya irəli bazalardakı dar məkanlardan qalxma və eniş etməyə imkan verir.

“Üfüqi uçuş” zamanı isə qanadlar açılaraq klassik sabitqanadlı hava vasitələrinin aerodinamik üstünlüklərini təmin edir.

Şirkətin açıqlamasına əsasən, sistem eyni ölçülü digər VTOL pilotsuz uçuş aparatları ilə müqayisədə daha az yer tutur və daha uzun uçuş müddəti ilə fərqlənir.

İlk müqavilə çərçivəsində təhvil veriləcək P4 “Transwing” pilotsuz uçuş aparatının maksimal qalxış çəkisi təxminən 40 kiloqram, faydalı yük daşıma qabiliyyəti isə 6,8 kiloqram təşkil edir.

Qeyd olunub ki, platforma kiçik, lakin əməliyyat baxımından vacib olan sursat, tibbi ləvazimat, ehtiyat hissələri və rabitə avadanlıqlarının daşınması üçün nəzərdə tutulub. Vurğulanır ki, Avstraliya Kral Donanmasının bu platformaya marağı Hind-Sakit okean regionunda logistik yanaşmaların dəyişməsi ilə bağlıdır.

Sevinc Əliyeva
Ordu.az