Ordu.az xəbər verir ki, bu barədə Türkiyənin “Yeni Şafak” nəşri yazıb.
Məqalə müəllifi martın 5-də həmin bölgədə İsrail qüvvələri ilə toqquşmalar barədə yayılan məlumatları xatırladığını bildirib. Həmin məlumatlara görə, baza guya iraqlı çoban tərəfindən aşkarlanıb, bundan sonra əraziyə hərbçilər gəlib, toqquşmalar baş verib, İraq qüvvələrinə hava zərbələri endirilib və döyüşlər zamanı iraqlı hərbçilər həlak olub.
Gərginliyin artmasından sonra İraq ordusu bölgədə yoxlamalara başlayıb və iddialara görə, bazanın mövcudluğu təsdiqlənib. Həmin vaxt İsrail artıq ərazini tərk etmişdi, lakin avadanlıqlar yerində qalmışdı. İraq Müdafiə Nazirliyi ərazinin logistik məqsədlərlə istifadə olunduğunu bildirib, eyni zamanda həmin bazadan raket buraxılışlarının həyata keçirildiyini də açıqlayıb.
Daha sonra məqalədə qeyd olunur ki, ABŞ hərbi bazalarının yerləşdiyi ərazilərdə İsrail strukturları da fəaliyyət göstərə bilər. Çünki İsrail ABŞ-nin hərbi mövcudluğundan örtük kimi istifadə edir və region boyunca fəaliyyət göstərmək imkanı qazanır.
Bu əsasda müəllif belə nəticəyə gəlir ki, ABŞ hərbi infrastrukturu İsrail üçün bir çox ölkə və bölgələrdə operativ mövcudluq yaradır.
Məqalədə həmçinin İran əleyhinə hücumlar dövründə baş verən, mənşəyi məlum olmayan gizli raket zərbələrindən bəhs olunur.
İran həmin hadisələrlə əlaqəsini təkzib etsə də, qeyd olunur ki, regionun bir çox ölkələri naməlum raket hücumlarına məruz qalırdı. Cavab olaraq İran Fars körfəzi ölkələrindəki ABŞ bazalarına zərbələr endirir, onlara ziyan vururdu. Lakin eyni zamanda xaos şəraitində, məqalənin versiyasına görə, məhz region ölkələri də naməlum hücumların hədəfinə çevrilirdi.
Bundan sonra müəllif belə bir şərh irəli sürür ki, İsrailin məqsədi İranı zəiflətmək və regionu daimi münaqişələr zonasına çevirmək üçün geniş Ərəb-İran müharibəsini təhrik etmək olub. İddia edilir ki, bu strategiya qismən həyata keçirilir, çünki Fars körfəzi ölkələri təmkin nümayiş etdiriblər, lakin İranla münasibətlərə artıq uzunmüddətli zərər dəyib.
Daha sonra məqalədə Səudiyyə Ərəbistanı, BƏƏ, İordaniya, Bəhreyn və Mərkəzi Asiyada İsrailin mümkün gizli bazaları ilə bağlı ehtimallardan bəhs olunur və regionda ortaya çıxan naməlum raketlərin məhz bu obyektlərdən buraxılıb-buraxılmadığı sual altına alınır.
Bundan sonra məqalə Şərqi Aralıq dənizi və Egey bölgəsində mümkün gizli əməliyyatlar və təxribatlarla bağlı versiyaları inkişaf etdirir. Buraya Türkiyə ilə Yunanıstan arasında mümkün münaqişə ssenariləri də daxildir. Müəllifin versiyasına görə, burada “naməlum raketlərdən” və hibrid təsir metodlarından istifadə edilə bilər.
Bu məntiqlə iddia olunur ki, İsrail vasitəçilər və regional ziddiyyətlər üzərindən dolayı münaqişələr yaratmaqda maraqlı ola bilər.
Sonda müəllif bildirir ki, qlobal geosiyasi dəyişikliklər şəraitində geniş regional münaqişələrin yaranması mümkündür və Şərqi Aralıq dənizi, eləcə də Türkiyə ilə Yunanıstan arasındakı dəniz zonası potensial gərginlik nöqtələrinə çevrilə bilər. Onun fikrincə, bu bölgələr diqqətlə izlənilməlidir.
Sevinc Əliyeva
Ordu.az
