Ordu.az xəbər verir ki, təhlükəsizlik qüvvələrinin inventarında aktiv istifadə olunan BARKAN 2 çətin sahə ssenariləri çərçivəsində öz imkanlarını sərgiləyəcək.
Məhsul ailəsinin ən yeni üzvü BARKAN 3 isə ilk dəfə genişmiqyaslı təlimdə sərgi sahəsində nümayiş olunub. SAHA 2026 sərgisində təqdimatı keçirilən BARKAN 3 bu dəfə təlimdə iştirak edən hərbi nümayəndə heyətlərinə təqdim edilib.
Daha qabaqcıl sensor birləşməsi, artırılmış faydalı yük qabiliyyəti və modul quruluşu ilə diqqət çəkən BARKAN 3 insansız sistemlərin gələcəyi ilə bağlı mühüm mesajlar verir.
Türkiyə müdafiə sənayesində yerlilik səviyyəsini və sahədəki insansız güc faktorunu artırmaq strategiyası çərçivəsində SAHA 2026 sərgisində BARKAN 3 platformalarının tədarükü üçün müqavilə dəyişiklikləri həyata keçirilib.
HAVELSAN yaxın dövrdə müxtəlif sayda BARKAN 3 platformasını təhlükəsizlik qüvvələrinə təhvil verməyə davam edəcək. BARKAN 2-nin yoxlama və qəbul fəaliyyəti uğurla başa çatdırılıb, BARKAN 3-ün yoxlama və qəbul fəaliyyətinin isə bu il ərzində tamamlanması planlaşdırılır.
HAVELSAN-ın “rəqəmsal birlik” konsepsiyası ilə hazırladığı BARKAN ailəsi sahədə istifadəçilərə bir sıra üstünlüklər təqdim edir. Yüksək riskli bölgələrə ilk girişin insansız platformalarla həyata keçirilməsi insan itkisi riskini azaldır. BARKAN pilotsuz uçuş aparatları və digər insansız platformalarla inteqrasiya olunaraq ortaq əməliyyat mənzərəsi təqdim edir.
Missiyadan asılı olaraq platformaya silah qülləsi, robot qol, KBRN sensorları və ya logistika yük səbəti quraşdırıla bilir. Qabaqcıl süni zəka alqoritmləri sayəsində GPS olmayan mühitlərdə belə marşrut planlama və maneələrdən yayınma funksiyalarını uğurla yerinə yetirir.
BARKAN seriyasının EFES təlimində iştirakı Türkiyənin insansız quru platformaları texnologiyasında çatdığı inkişaf səviyyəsini bir daha nümayiş etdirib. Yeni versiya ilə birlikdə yeni imkanlar da təqdim olunub. BARKAN 3 orta sinfə məxsus 2-ci səviyyə insansız quru platforması kateqoriyasına daxildir.
Platformanın sponson quruluşu yenidən hazırlanaraq ərazi performansı və manevr qabiliyyəti yaxşılaşdırılıb. Həcm və ölçü baxımından digər BARKAN versiyalarından daha böyük olan platformanın stabilliyi və yükdaşıma qabiliyyəti artırılıb.
Yürüş sistemi (tırtıl, asqı və yol təkərləri) yenilənib. Güc ötürmə sistemi təkmilləşdirilərək daha yüksək sürət və fırlanma anı əldə olunub. Batareya paketi və sistem arxitekturası yenidən hazırlanaraq enerji səmərəliliyi artırılıb. Sürət, su keçidi və şaquli maneələri aşma bacarıqları inkişaf etdirilib.
Sürücülük və ətraf müşahidə kameraları inteqrasiya olunub. Çoxsaylı “LiDAR” inteqrasiyaları həyata keçirilib, radar əsaslı avtonomluq sensorları sistemə daxil edilib.
Avtonomluq alqoritmlərində optimallaşdırma işləri aparılıb və avtonomluq səviyyəsi yüksəldilib. Maneələrdən yayınma, dinamik marşrut planlama və lider izləmə bacarıqları təkmilləşdirilib.
GPS-dən asılı olmadan missiya icra etmək qabiliyyəti gücləndirilib. 3D xəritələmə və ətraf mühitin qavranılması performansı artırılıb. Rabitə itkisi zamanı təhlükəsiz geri dönüş mexanizmləri hazırlanıb. İkiqat faydalı yük daşıma qabiliyyəti qorunaraq optimallaşdırılıb. Radar müşahidə sistemi və silah sistemlərinin inteqrasiyası davam etdirilib.
Sevinc Əliyeva
Ordu.az
