Ordu.az xəbər verir ki, bu barədə “News.am” nəşrinin Çexiyanın Ermənistandakı fövqəladə və səlahiyyətli səfiri Petr Pirunçikə ünvanlanan sorğusuna cavab olaraq səfirlikdən bildirilib.
Çexiyanın diplomatik nümayəndəliyi xatırladıb ki, layihə ilə bağlı Çexiya tərəfinin təşəbbüsü hələ 2018-ci ildə başlayıb.
Səfirliyin məlumatına görə, məqsəd əvvəlcədən Çexiya-Ermənistan iqtisadi və texnoloji əməkdaşlıq imkanlarının, xüsusilə yüngül aviasiya, idman təyyarələrinin istehsalı və əlaqəli texniki imkanlar sahəsinin araşdırılması olub.
“Stepanavanla bağlı ictimai şəkildə xatırlanan layihə ləğv edilməyib. Proqram Ermənistanda yüngül təyyarələr və idman uçuş aparatlarının istehsal və ya montaj bazasının mərhələli şəkildə yaradılması imkanının nəzərdən keçirilməsinə əsaslanır. Çexiya tərəfinin bu istiqamətdəki fəaliyyəti Çexiya Respublikasındakı aviasiya istehsalı ilə bağlı “nou-hau” və istehsal təcrübəsinə söykənir”, - deyə səfirlikdən bildirilib.
Layihənin həyata keçirilməsi istiqamətində indiyədək hansı addımların atıldığı barədə suala cavab olaraq səfirlik bildirib ki, uyğun ərazinin seçilməsi, texniki və istehsal şərtlərinin qiymətləndirilməsi, Ermənistan tərəfdaşlarının iştirakının dəqiqləşdirilməsi və mümkün istehsal və ya montaj fəaliyyətinə başlamaq üçün zəruri praktiki şərtlərin qiymətləndirilməsi ilə bağlı məsləhətləşmələr davam etdirilib.
Səfirlik qeyd edib ki, layihə başlanğıcdan istehsalın sürətli başlanğıcı kimi deyil, mərhələli və uzunmüddətli proses kimi nəzərdə tutulub.
“Bu niyyətlə əlaqəli olaraq Çexiya Politexnik İnstitutu ilə İrəvan Aviasiya Tədris Mərkəzi arasında aviasiya heyətinin hazırlanması sahəsində əməkdaşlıq proqramı kifayət qədər perspektivli şəkildə inkişaf edir. Layihə əsasən Ermənistanda Avropa standartlarına uyğun pilot və aviasiya texniklərinin hazırlanmasına yönəlib. Bu, daha geniş təşəbbüslə sıx bağlı olan çox mühüm komponentdir, çünki Stepanavanda təyyarə istehsalının gələcək uğurlu başlanğıcı üçün vacib olacaq peşəkar kadr bazasını formalaşdırır”, - deyə səfirliyin cavabında qeyd olunub.
Layihənin hazırkı mərhələdə nə dərəcədə real olduğu və hələ də aktiv təşəbbüs sayılıb-sayılmadığı ilə bağlı suala cavab olaraq səfirlik bildirib ki, layihə ləğv edilməsə də, onun həyata keçirilməsi daha geniş regional şərtlərdən asılıdır.
Səfirlik layihənin həyata keçirilməsinə mane olan amilləri də sadalayıb.
“Layihənin gələcək inkişafına Ukraynada müharibənin başlamasından sonra baş verən ciddi geosiyasi və iqtisadi dəyişikliklər, həmçinin daha geniş regional kontekst təsir göstərib. Bu amillər təşəbbüsün praktiki həyata keçirilməsinə, maliyyələşməyə, logistikaya və vaxt qrafikinə təsir edir. Buna görə də layihə hazırda istehsalın dərhal başlanğıcı mərhələsində deyil, gələcək qiymətləndirmə və davam üçün real model axtarışı mərhələsindədir.
Bu layihə Çexiya-Ermənistan uzunmüddətli iqtisadi və təhsil əməkdaşlığı proqramıdır və onun həyata keçirilməsi regiondakı ümumi şəraitdən, tənzimləyici mühitdən, iqtisadi səmərəlilikdən və ixtisaslı kadrların mövcudluğundan asılıdır”, - deyə səfirlikdən bildirilib.
Xatırladılıb ki, 2023-cü ilə qədər layihə dəfələrlə yüksək səviyyədə, o cümlədən Ermənistan və Çexiyanın baş nazirləri və rəsmi nümayəndə heyətləri arasında keçirilən görüşlərdə müzakirə olunub.
“News.am” nəşrinin ötən ay Ermənistanın Ərazi İdarəetməsi və İnfrastruktur Nazirliyinə göndərdiyi sorğuya cavab olaraq erməni nazir müavini Armen Simonyan bildirmişdi ki, Çexiya tərəfi indiyədək Stepanavanda kiçik təyyarə istehsalının yaradılması ilə bağlı konkret proqram təqdim etməyib.
Alpər Mövludoğlu
Ordu.az
