Ordu.az xəbər verir ki, bunu Ermənistanın keçmiş xarici işlər naziri Ara Ayvazyan deyib.
Ayvazyanın sözlərinə görə, aprelin 1-də Kremldə Paşinyanla görüş zamanı Rusiya Prezidenti Vladimir Putin açıq şəkildə “qırmızı xətləri” göstərib və onların müdafiəsi üçün malik olduğu vasitələri nümayiş etdirib.
Keçmiş erməni nazir qeyd edib ki, bundan sonra Rusiya prezidentinin daha sərt ictimai bəyanatı səsləndirilib və həmin açıqlamada artıq ultimatum xarakterli mesajlar yer alıb.
“Rusiya icazə verilən sərhədləri aydın şəkildə göstərdi və eyni zamanda onları qətiyyətlə qorumağa hazır olduğunu nümayiş etdirdi”, - deyə o bildirib.
Ayvazyan hesab edir ki, Moskva artıq Ermənistanın hazırkı hakimiyyətini etibarlı tərəfdaş saymır.
Onun fikrincə, Rusiya eyni zamanda strateji rəqiblərinin Ermənistanı tədricən əsas tərəfdaşa çevirdiyini və Gürcüstanla Ukrayna böhranlarından əvvəl baş verən proseslərə bənzər vəziyyət formalaşdırdığını görür.
“Rusiya görünür ki, artıq bu prosesləri nə yumşaq siyasətlə, nə də səbir vasitəsilə uzaqdan izləyə bilməyəcəyini düşünür”, - deyə Ayvazyan vurğulayıb.
Keçmiş erməni xarici işlər nazirinin sözlərinə görə, Paşinyan Putinin xəbərdarlıqlarına cavab olaraq Avrasiya İqtisadi Birliyinin nizamnaməsində üzv dövlətlərin çıxarılması mexanizminin nəzərdə tutulmadığını bildirib.
Ayvazyan qeyd edib ki, bu yanaşma hakimiyyətin ya real riskləri anlamadığını, ya da geosiyasi dönüş naminə onları bilərəkdən görməzdən gəldiyini göstərir.
“O təşkilata üzvlük hələ təhlükəsizlik zəmanəti demək deyil. Ermənistan qurum daxilində real təsir imkanına malik olmadıqda həm xarici ticarət, həm də investisiya cəlbi baxımından son dərəcə həssas vəziyyətə düşəcək”, - deyə o bildirib.
Ayvazyan deyib ki, Ermənistan cəmiyyətində Rusiya və KTMT-yə qarşı məyusluq mövcuddur və bu, 2020-2023-cü illərdəki hərbi təhdidlərə effektiv reaksiya verilməməsi ilə bağlıdır. Bununla belə, onun fikrincə, bir müttəfiqin uğursuzluğu Ermənistanın ümumiyyətlə müttəfiqlərə və təhlükəsizlik təminatçılarına ehtiyac duymadığı anlamına gəlmir.
“Əgər sənin təhlükəsizlik zəmanəti verən tərəfin bir gün gözləntilərini doğrultmayıbsa, bu o demək deyil ki, sənə ümumiyyətlə təminat lazım deyil. Hazırda biz təhlükəsizlik vakuumu şəraitindəyik və bu, olduqca partlayış təhlükəli vəziyyətdir”, - deyə o bildirib.
Bununla yanaşı, Ayvazyan çıxış yolunun özünütəcrid deyil, münasibətlərin yenidən qurulması olduğunu vurğulayıb. O hesab edir ki, Rusiya ilə etimad bərpa olunmalı, KTMT mövcud reallıqlara uyğunlaşdırılmalı və eyni zamanda “Şimal-Cənub” oxu regional sabitliyin geosiyasi və infrastruktur dayağı kimi inkişaf etdirilməlidir.
Onun sözlərinə görə, bu format həm Moskvanın, həm də Tehranın maraqlarına cavab verir, çünki hər iki ölkə hazırda təcrid cəhdləri ilə üzləşir və alternativ marşrutlarda maraqlıdır.
“Rusiya Qərb bazarlarına çıxış imkanlarını itirir, İran da digər istiqamətlərdən oxşar təzyiqlərlə üzləşir və hər iki ölkə üçün bu ox həyati əhəmiyyət daşıyır”, - deyə Ayvazyan bildirib.
Sonda Ayvazyan qeyd edib ki, qarşıdan gələn seçkilər geosiyasi düşərgə seçimi deyil, ölkənin suverenliyini hakimiyyət naminə qurban verən qüvvələrlə Ermənistanın real təhlükəsizliyini öz resursları, diaspor və bərpa edilmiş müttəfiqlik münasibətləri hesabına təmin edə biləcək qüvvələr arasında seçim olacaq.
Alpər Mövludoğlu
Ordu.az
