Ordu.az xəbər verir ki, bu sözləri bu gün Ermənistanın hakim “Vətəndaş Müqaviləsi” partiyasının təbliğat kampaniyası zamanı baş nazir Nikol Paşinyana müraciət edən ölmüş erməni hərbi qulluqçunun anası deyib.

“18 il uşaq böyütdüm, bu orduya verdim, mənim uşağım haradadır, niyə 15 uşağı yandırdınız? Mənim uşağım 12:30-da sağ idi. Necə bu qədər əmin idiniz ki, onlar yanıb və çölə çıxa bilməyib, ki, ertəsi gün belə bir açıqlama verdiniz? Cavab verin, o 15 uşaq haradadır, niyə bizi bu qədər qaranlıq içində qoydunuz? Mən sizi iki dəfə seçmişəm, amma o günə lənət olsun, siz mənim uşağımın ölümünə səbəb oldunuz, 15 uşağı öldürdünüz və bu gün gəlib deyirsiniz ki, uşaq bağçası tikdik, pensiyanı artırdıq”, - deyə erməni qadın bildirib.

Cavab olaraq Nikol Paşinyan qeyd edib ki, iş hazırda məhkəmədədir. Daha sonra Paşşinyan həmin sözləri müxalifətin toplantılarında deməyi tövsiyə edib, çünki həmin hadisədən sonra işdən azad etdiyi korpus komandirinin müavini indi müxalif fəaldır.

“Yaxşı, xanım, başa düşdük, bundan sonra korpus komandiri işdən azad edilib, onlarla vəzifəli şəxs işdən çıxarılıb. İndi onlar mühakimə olunur. Mən valideynlərin həyəcanını anlayıram, amma niyə müxalifətin yığıncaqlarına getmirsiniz? Korpus komandirinin müavini indi müxalif fəaldır. Mən onları işdən azad etdim və ordudan qovdum, çünki öz vəzifələrini yerinə yetirmədilər. Burada türklər-mürklər deməyin, o Kaluqadan pulla yayılmış narrativləri burada ümumiyyətlə deməyin”, - deyə o bildirib.

Alpər Mövludoğlu
Ordu.az