Ordu.az xəbər verir ki, bunu “168.am”a müsahibəsində rusiyalı analitik Aleksandr Xramçixin deyib.

Onun sözlərinə görə, böyük ehtimalla bu model ona görə seçilib ki, Avropa İttifaqı üzvlük vəd etmir və hətta vəd etsə belə, həmin üzvlüyün mümkün olub-olmayacağını demək çətindir.

Analitikin fikrincə, bütün bunları anlayan Ermənistan Avrasiya İqtisadi Birliyini tərk etmək istəmir, çünki bu qurum Ermənistan Respublikası üçün faydalıdır.

“Ermənistanın hesablamaları başadüşüləndir, lakin aydındır ki, bu model Rusiya üçün qəbuledilən deyil və olmayacaq. Çünki Rusiya postsovet məkanında avrointeqrasiya yolunu seçən digər cəhdlərə həmişə reaksiya verib. Ermənistan məsələsində isə Rusiya tərəfi sadəcə seçim etməyə və mövqeyini müəyyənləşdirməyə çağırır. Burada Rusiyanın taktikasındakı dəyişikliyi qeyd etmək vacibdir. Əgər əvvəllər Moskva açıq təzyiq mexanizmlərindən istifadə edirdisə, bu gün siyasi praqmatizmə keçib. Rusiyanın Ermənistanın Avropa İttifaqı ilə Avrasiya İqtisadi Birliyi arasında seçim etməli olduğu barədə bəyanatları göstərir ki, Rusiya artıq Ermənistanı “qeyd-şərtsiz müttəfiq” kimi görmür və maraqlara əsaslanan münasibətlər modelinə keçib. Bu isə o deməkdir ki, Moskva artıq onun geosiyasi gündəliyini bölüşməyənləri yanında saxlamaq niyyətində deyil. O, sərhədi müəyyənləşdirərək açıq şəkildə bildirir ki, Avropa seçimi Rusiyanın bütün iqtisadi imtiyazlarının dayandırılması ilə nəticələnəcək”, - deyə analitik bildirib.

O hesab edir ki, Moskvanın Avrasiya İqtisadi Birliyi platformasını müzakirə məkanı kimi seçməsi Rusiyanın bu məsələni açıq şəkildə müzakirə etməkdən çəkinmədiyini göstərir. Çünki siyasi aydınlıq daha vacibdir.

“Düşünürəm ki, bu, münasibətlərin növbəti dəfə soyuması deyil, sistemli problemdir. Burada İrəvanın siyasi tam razılıq olmadan iqtisadi əlaqələri qorumaq cəhdləri Rusiyanın sərt reaksiyası ilə qarşılaşacaq. Hesab etmirəm ki, münasibətlər üçün hansısa yeni formul tapmaq mümkündür. Qeyd etmək lazımdır ki, münasibətlər artıq dəyişib, Rusiya da bunu rəsmən qeydə alır və bu məsələni müzakirə etməyi təklif edir. Bu baxımdan Avrasiya İqtisadi Birliyinin qarşıdakı toplantısı mühüm olacaq və üzv ölkələrin bu məsələ ilə bağlı hansı mövqeyə sahib olduqları aydınlaşacaq”, - deyə o vurğulayıb.

Alpər Mövludoğlu
Ordu.az