Ordu.az xəbər verir ki, Franken Belçika müdafiə sektorunun Türkiyə müdafiə şirkətləri ilə daha yaxın əməkdaşlıq qurmağa böyük maraq göstərdiyini deyib.
10-14 may tarixlərində Ankara və İstanbulda keçiriləcək Belçika İqtisadi Missiyası öncəsi dəyərləndirmələr edən Franken Türkiyənin yalnız iqtisadi baxımdan deyil, eyni zamanda NATO daxilində strateji mövqeyi və müdafiə istehsalı qabiliyyəti ilə də kritik tərəfdaş olduğunu bildirib.
Türkiyə müdafiə sənayesindən öyrənmək istəyirik
Belçikalı nazir iqtisadi missiya çərçivəsində çoxsaylı müdafiə sənayesi şirkətinin Türkiyəyə gələcəyini bildirərək, nümayəndə heyətində 60 ilə 80 arasında müdafiə firmasının olduğunu açıqlayıb.
Franken Türkiyə müdafiə sənayesinin xüsusilə aşağıdakı sahələrdə diqqətçəkən irəliləyiş əldə etdiyini deyib:
Tədqiqat və inkişaf fəaliyyəti
İnnovasiya qabiliyyəti
Yerli istehsal infrastrukturu
Yüksək ixtisaslı insan resursu
Müdafiə texnologiyalarında müstəqilləşmə
“Bizim müdafiə sektorumuzun mühüm bir hissəsi Türkiyə müdafiə sənayesindən nəsə öyrənməyə böyük maraq göstərir”, - deyə Franken bildirib.
O, həmçinin qeyd edib: “Türkiyə müdafiə sənayesi innovasiya və güclü müdafiə qabiliyyəti yaratmaq məsələsində həqiqətən çox irəlidədir. Buna görə də onlar mənim üçün bir rol modeldir”.
Müdafiə əməkdaşlıqlarında yeni razılaşmalar gündəmdə
Teo Franken Belçika şirkətləri ilə Türkiyə müdafiə firmaları arasında yeni iş əlaqələrinin qurulmasının hədəfləndiyini bildirib. Müdafiə şirkətlərinə əlavə olaraq universitetlər və tədqiqat müəssisələri arasında da əməkdaşlıqların planlaşdırıldığını qeyd edən Franken, indiyədək imzalanması gözlənilən razılaşma sayının 40-a çatdığını deyib.
Belçikalı nazir çoxsaylı yeni razılaşmanın isə yekunlaşdırılma mərhələsində olduğunu bildirib.
Müdafiə sahəsində əməkdaşlıqların yalnız kommersiya ölçüsü daşımadığını vurğulayan Franken birgə istehsal, texnologiya paylaşımı və sənaye infrastrukturunun inkişafı kimi başlıqların da önəm qazandığını qeyd edib.
NATO və birgə istehsal vurğusu
Franken NATO daxilində müdafiə istehsalı qabiliyyətinin artırılmasının qarşıdakı dövrün əsas mövzularından biri olacağını bildirərək, Ankarada keçiriləcək NATO sammitinin bu baxımdan kritik əhəmiyyət daşıdığını söyləyib.
O, sammitdə aşağıdakı başlıqların önə çıxacağını qeyd edib:
Müdafiə istehsalı qabiliyyəti
Birgə istehsal modelləri
Sənaye əməkdaşlığı
Tədarük zəncirinin dayanıqlılığı
NATO müttəfiqləri arasında koordinasiya
Franken Türkiyənin NATO daxilində rolunun getdikcə daha strateji xarakter aldığını bildirib.
“Düşünürəm ki, Türkiyə böyük iqtisadi və geosiyasi gücdür. Birlikdə işləməliyik. Bu həm bizim, həm də Türkiyənin marağınadır”, - deyə o bildirib.
Sevinc Əliyeva
Ordu.az
