Ordu.az xəbər verir ki, şirkətin yeni süni zəka modeli “Mythos” prosesi dəyişdirmiş ola bilər.
ABŞ Prezidenti Donald Tramp süni zəka şirkəti “Anthropic” ilə ABŞ Müharibə Nazirliyi (Pentaqon) arasında yenidən razılaşma ehtimalının yarandığını açıqlayıb. CNBC-yə danışan Tramp şirkət nümayəndələrinin qısa müddət əvvəl Ağ Evi ziyarət etdiyini bildirərək deyib: “Çox səmərəli görüşlər keçirdik, məncə, irəliləyiş əldə edirlər”. Tramp “Anthropic” heyəti barədə həmçinin bildirib: “Çox ağıllıdırlar və məncə çox faydalı ola bilərlər”.
Böhran necə başladı?
Bu açıqlama ilin əvvəlində Pentaqon ilə “Anthropic” arasında yaşanan ciddi gərginlikdən sonra verilib. Mart ayında ABŞ Müharibə Nazirliyi “Anthropic”i “təchizat zənciri riski” kimi təsnif etmiş və şirkətin texnologiyasının milli təhlükəsizliyi təhdid edə biləcəyini irəli sürmüşdü. Bu qərara uyğun olaraq müdafiə podratçıları üçün hərbi layihələrdə “Anthropic”in “Claude” süni zəka modellərindən istifadə etmədiklərini sənədləşdirmək öhdəliyi tətbiq edilmişdi.
Tramp da həmin dövrdə “Truth Social” platformasında etdiyi açıqlamada bütün federal qurumlara “Anthropic” texnologiyasının istifadəsini dərhal dayandırmaq göstərişi vermiş və administrasiyanın şirkətlə bir daha işləməyəcəyini elan etmişdi. Lakin bu sərt mövqeyə baxmayaraq, Pentaqonun İran ilə yaşanan müharibə dövründə “Claude” modelindən istifadə etməyə davam etdiyi üzə çıxmışdı.
“Anthropic” qara siyahı qərarına qarşı məhkəmə iddiası qaldıraraq bu məhdudiyyətləri ləğv etdirməyə çalışıb. Proses davam edərkən, Trampın sosial media üzərindən etdiyi qadağa çağırışı isə federal hakim tərəfindən müvəqqəti olaraq dayandırıldı.
Son həftələrdə tərəflər arasındakı gərginliyin azalmağa başladığı diqqət çəkir. Xüsusilə “Anthropic”in baş icraçı direktoru Dario Amodeinin yüksək səviyyəli administrasiya rəsmiləri ilə keçirdiyi təmaslar münasibətlərin yenidən normallaşa biləcəyinə işarə edir.
“Mythos” modeli qapıları açdı
Ötən cümə günü Amodei Ağ Evin aparat rəhbəri Syuzi Uaylz və ABŞ-nin maliyyə naziri Skott Bessent ilə görüşərək şirkətin yeni süni zəka modeli “Mythos” barədə təqdimat edib. Ağ Ev mənbələri bu görüşü “səmərəli və konstruktiv” kimi xarakterizə edib.
“Anthropic”in bu ay elan etdiyi “Mythos” modeli xüsusilə qabaqcıl kibertəhlükəsizlik imkanları ilə seçilir. Şirkət modelin hazırda yalnız məhdud sayda qurumla sınaqdan keçirildiyini və ABŞ hökuməti ilə davam edən danışıqların sürdüyünü açıqlayıb.
“Anthropic” ilə Pentaqon arasındakı böhranın kökü isə ötən il aparılan əməkdaşlıq danışıqlarına gedib çıxır. 2021-ci ildə qurulan şirkət iyul ayında Pentaqon ilə 200 milyon dollarlıq müqavilə imzalamışdı. Lakin sentyabr ayında “Claude” modelinin ABŞ Müharibə Nazirliyinin “GenAI.mil” platformasına inteqrasiyası ilə bağlı aparılan danışıqlar dalana dirənmişdi.
Pentaqon “Anthropic”dən süni zəka modellərinə bütün qanuni istifadə sahələrində məhdudiyyətsiz çıxış tələb edib. Buna qarşılıq şirkət texnologiyasının tam avtonom silah sistemlərində və ya ölkə daxilində kütləvi nəzarət fəaliyyətlərində istifadə olunmayacağına dair təminat istəyib. Tərəflər bu əsas məsələdə razılığa gələ bilmədikləri üçün saziş ləğv olunub.
Sevinc Əliyeva
Ordu.az
