Ordu.az xəbər verir ki, bu barədə Niderlandın Kəşfiyyat və Təhlükəsizlik Xidməti (AIVD) məlumat yayıb.

“Fəaliyyət göstərdiyimiz 80 il ərzində milli təhlükəsizliyin eyni anda bu qədər çox tərəfdən və bu qədər uzun müddət təzyiq altında qaldığı indiki səviyyədə təhdidlə qarşılaşmamışdıq. Biz onilliklərlə davam edən sabitlik və proqnozlaşdırıla bilənlikdən sonra qeyri-sabit və gözlənilməz qlobal nizamın formalaşdığını görürük. Halbuki həmin sabitlik və proqnozlaşdırıla bilənlik rifahın və sülhün əsası idi”, - deyə AIVD-nin direktoru Simona Smit qurumun illik hesabatının təqdimatı zamanı bildirib.

Əvvəlki illərdə olduğu kimi, Niderlandın Kəşfiyyat və Təhlükəsizlik Xidməti də ölkənin NATO və Avropa İttifaqının təsisçi üzvlərindən biri kimi Rusiya və Çindən gələn təhdidlərlə üzləşdiyini vurğulayıb.

Kəşfiyyatın hesabatında qeyd olunur ki, Rusiya Qərb ölkələrinə, o cümlədən Niderlanda qarşı daha da aqressiv davranmağa başlayıb. Bu, əsasən kiberhücumlarla bağlıdır.

Hesabatda vurğulanır ki, Rusiya Qərblə uzunmüddətli qarşıdurmaya hazırlaşır. Nəticə etibarilə, Rusiya ilə Qərb arasında hərbi münaqişə artıq ağlasığmaz görünmür.

Sevinc Əliyeva
Ordu.az