Ordu.az xəbər verir ki, bu barədə Ermənistanın “Past” nəşri “Sadəcə gündəmi diktə etmək və mesajı ictimaiyyətə çatdırmaq” başlıqlı məqaləsində yazıb.

Nəşr qeyd edib ki, amma təkcə auditoriya kifayət deyil.

“Bəs Nikol Paşinyan nə edir? İstər müxalifətdə olduğu dövrdə, istərsə də xüsusilə son illərdə o, sadəcə hər gün gündəm formalaşdırır, gündəm yaradır və informasiya axınını doldurur. Necə? Paşinyan yemək yeyir, “challenge” edir, qalmaqal yaradır, aldadır, yalanın üstündən yalan danışır, anlaşılmaz və xüsusilə mübahisəli fikirlər səsləndirir, qışqırır, əl-qol hərəkətləri edir, hətta formal və səmimiyyətsiz “üzr” istəyir, rəqs edir, nağara çalır və s. Üstəlik, nə qədər məzmunsuz olsa, bir o qədər yaxşıdır.

Onun bu davranışları və özünüifadəsi mütləq şəkildə hansısa dairələri ittiham etməklə müşayiət olunur. Hansı dairələr olması vacib deyil: bir gün “keçmişlər”, başqa gün kilsə, başqa vaxt Rusiya, “qaranlıq qüvvələr”, tarixi şəxsiyyətlər, nəhayət “qürurlu vətəndaş”.

Müxalifət və cəmiyyətin adekvat hissəsi isə onun dediklərinə reaksiya verir, cavab verir, bəzən sərt ifadələr işlədərək qarşılıq verir. Qısası, reaksiya verirlər. Və beləliklə, Paşinyan bu yolla da gündəmin “birinci səhifəsində” qalır. Bu müəyyən mənada təbiidir, çünki insanlar təkcə rasional deyil, həm də emosionaldırlar və müxtəlif mövzulara reaksiya verməmək mümkün deyil. Nəticədə isə Paşinyan məqsədinə çatır”, - deyə nəşr bildirib.

Müəllif yazıb ki, amma məsələnin digər tərəfi də var. Təkcə Paşinyanın texniki alətləri yoxdur. Müxalifətin əsas fiqurlarının fəaliyyətinə baxdıqda aydın olur ki, onlar da yalnız gündəm formalaşdırmaq yox, həm də “sirkvari” deyil, daha məzmunlu və ciddi gündəm yarada bilirlər. Üstəlik, müxalifət gündəm formalaşdıranda Paşinyan və onun komandasının təbliğatçıları buna mütləq reaksiya verir, bəzən isə hətta isterik davranışlar nümayiş etdirirlər.

“Digər tərəfdən, müşahidələr göstərir ki, son dövrlərdə Paşinyan öz təbliğatının ikinci və üçüncü “eşelonlarını” az istifadə edir. Əsasən özü və bir neçə nəfər bu yükü daşıyır. Görünür, o, digərlərinə etibar etmir, çünki onların aktivliyi daha çox problem yaradır, nəinki fayda gətirir.

Bütün bunlardan hansı nəticələr çıxır?

Əvvəla, müxalifətin əsas vəzifəsi bu mərhələdə gündəm formalaşdırmaq olmalıdır. Əsas müxalif qüvvələrin konkret təklifləri var, həm Samvel Karapetyanın təklifləri, həm ikinci prezident Robert Köçəryanın qiymətləndirmələri, həm Qaqik Tsarukyanın “Ermənistana təklif” təşəbbüsü, həm də “Hayakve”nin yanaşmaları mövcuddur. Bu qüvvələrin ən vacib üstünlüyü, onların cəmiyyətə deyəcək sözü var. Paşinyan və onun partiyası isə belə məzmundan məhrumdur. Müxalifətin təqdim edəcək alternativləri var, Paşinyanın isə seçki rüşvəti və müharibə ritorikasından başqa təqdim edəcəyi bir şey yoxdur”, - deyə məqalədə bildirilib.

Nəşrə görə, Paşinyanın mesajı ondan ibarətdir ki, o seçilməsə, müharibə olacaq.

“Müxalifət isə deməlidir ki, əksinə, onlar seçilsə, müharibə olmayacaq və məhz Paşinyan müharibə və məğlubiyyətin simvoludur. Burada mübahisə etməyə də ehtiyac yoxdur, sadəcə həqiqəti demək lazımdır. Görünür, müxalifət artıq bunu etməyə başlayıb. Ümumiyyətlə, müxalifətin əsas vəzifəsi cəmiyyətə gündəlik olaraq reallığı çatdırmaqdır. Hakimiyyət isə yalnız yalan danışa bilər.

Bu qarşıdurmada həm məntiqi, həm də emosional baxımdan üstünlük müxalifətin tərəfindədir.

Qısası, elə etmək lazımdır ki, hakimiyyət daim reaksiya verməyə məcbur olsun. Belə şəraitdə Paşinyan və onun yaxın çevrəsi fiziki olaraq bütün ittihamlara cavab verə bilməyəcək, üstəlik daha əsəbi və gərgin olacaqlar. Yəni gündəmi elə qurmaq lazımdır ki, hakimiyyət müxalifətin mövqelərinə cavab versin, əksinə yox.

Paşinyanın rəhbərlik etdiyi hakimiyyət əslində çox həssas və zəifdir. Bu hakimiyyət müharibəyə görə, minlərlə hərbçinin ölümü, hərbi potensialın itirilməsi, ərazi və insan itkiləri, milli dəyərlərin zədələnməsi və digər ağır nəticələrə görə ittiham olunur.

Belə şəraitdə müxalifət üçün əsas məsələ çətin olmamalıdır: sadəcə həqiqəti demək və öz təkliflərini ön plana çıxarmaq lazımdır. Paşinyan bütün istiqamətlərdən gələn ittihamlara cavab verməyə çatmamalıdır”, - deyə KİV bildirib.

Nəşr qeyd edib ki, amma təkcə ittihamlar kifayət deyil.

“Bu, sadəlövh yanaşma olardı. Müxalifətin real təklifləri var və onlar ön plana çəkilməlidir. Bu təkliflər ətrafında müzakirələr qurulmalıdır. Təxminən 1-in 5-ə nisbətində.

Və heç bir halda Paşinyanla birbaşa polemikaya girmək olmaz. Onun manipulyativ oyunlarına qoşulmamaq lazımdır. Sadəcə gündəmi diktə etmək və hər kəsin öz üslubu ilə onu formalaşdırması vacibdir.

Nəticə olaraq, Paşinyanı siyasi baxımdan məğlub etmək heç də mümkünsüz deyil. Sadəcə müxalifət diqqəti artıq cəmiyyət tərəfindən geniş şəkildə rədd edilən Paşinyana yox, öz fəaliyyətinə və təkliflərinə yönəltməlidir.

Bir də yaxşı olardı ki, özlərini müxalifət kimi təqdim edən bəzi dairələr digər müxalif qüvvələrə qarşı hücumları dayandırsınlar... Əgər onların məqsədi Paşinyanın yenidən hakimiyyətdə qalması deyilsə”, - deyə nəşr bildirib.

Alpər Mövludoğlu
Ordu.az