Ordu.az xəbər verir ki, bu barədə Rusiyanın “Mk.ru” nəşri “Ermənistanın Baş naziri “Moldova modeli”ndən istifadə edərək hakimiyyəti ələ keçirməyə hazırlaşır” başlıqlı məqaləsində yazıb.
“Onun sözlərinə görə, Müstəqillik Bəyannaməsi “münaqişə məntiqi üzərində qurulub”. Bundan əlavə, iyunun 7-də Ermənistanda keçiriləcək parlament seçkiləri ərəfəsində Paşinyan rejimi rəqiblərinə qarşı qabaqlayıcı tədbirlər görür. Onların bir çoxu tezliklə cinayət təqibinə məruz qala bilər.
Xatırladaq ki, Bəyannamə 1990-cı il avqustun 23-də Ermənistan SSR Ali Sovetinin iclasında qəbul edilib. Həmin sənədlə SSRİ-nin tərkibində olan Ermənistan Sovet Sosialist Respublikası ləğv edilib və SSRİ Konstitusiyası ilə qanunlarının artıq qüvvədə olmadığı müstəqil Ermənistan Respublikası elan olunub. Hazırkı Ermənistan Konstitusiyasının preambulasında qeyd olunur ki, ölkə məhz bu hüquqi sənəd əsasında qurulub. Başqa sözlə, Müstəqillik Bəyannaməsi müasir Ermənistan dövlətinin qurulduğu ilk kərpicdir. Tikinti ilə məşğul olanlar isə bilirlər ki, bəzən cəmi bir kiçik kərpici çıxarmaq bütün quruluşu dağıtmaq üçün kifayətdir. Lakin Bakı və Ankara həmin kərpicin çıxarılmasını tələb edir. Məhz onların istəyi ilə Paşinyan Ermənistan Konstitusiyasını yenidən yazmaq istəyir. Yeni əsas qanunun ilkin mətninin mart ayında ictimai müzakirə üçün dərc olunması planlaşdırılır. Lakin aydındır ki, ictimai rəyindən asılı olmayaraq, Müstəqillik Bəyannaməsinə istinad yalnız Ermənistanda hakimiyyət dəyişikliyi olacağı halda Konstitusiyada qalacaq”, - deyə nəşr bildirib.
KİV-ə görə, məsələ ondadır ki, mövcud hakimiyyət xarici “tərəfdaşlarının” bütün istəklərini nəzərə almağa hazırdır.
“Paşinyan bunu yenidən təsdiqləyərək “soyqırımı muzey-institutu”nun direktoru Edita Qzoyanı vəzifəsindən azad edib. Bu qadın ABŞ-nin vitse-prezidenti C.D. Vensin Ermənistana səfəri zamanı ona Qarabağın “tarixi” haqqında kitab hədiyyə edib. Bu isə bağışlanmaz sayılıb. Baş nazir bunu hökumətin siyasətinə zidd təxribat xarakterli addım kimi qiymətləndirib və onu şəxsən işdən azad edib. Bunların hamısı korrupsiyalaşmış məmurların və KQB agentlərinin “nağıllarıdır”. Bəli, bəli, KQB agentləri, düz eşitdiniz. Paşinyan israr edir ki, Erməni Apostol Kilsəsi xaricdən, “KQB kanalları” ilə idarə olunur və bu, onun fikrincə, milli təhlükəsizliyə təhdiddir. O, daha əvvəl bütün ermənilərin katolikosu II Qareginin qardaşı, Rusiya və Naxçıvan-na-Donu yeparxiyasının rəhbəri arxiyepiskop Yezras Nersisyanı “KQB agenti” adlandırmışdı. Əslində isə SSRİ Dövlət Təhlükəsizlik Komitəsi Mixail Qorbaçov tərəfindən imzalanmış qanunla 1991-ci il dekabrın 3-də ləğv edilib, lakin görünür, Paşinyan bunu bilmir”, - deyə müəllif qeyd edib.
KİV vurğulayıb ki, Paşinyan, həmçinin Erməni Apostol Kilsəsinin rəhbərliyini Ermənistanda “müharibə partiyasına” rəhbərlik etməkdə ittiham edib.
“O, bu iddiaları martın 11-də Avropa Parlamentində səsləndirib. Avropa Parlamentinin deputatları qarşısında din xadimlərinə qarşı təqibləri əsaslandırmağa çalışan Ermənistanın Baş naziri kilsə nümayəndələrini “xarici kəşfiyyat xidmətlərinin” təsiri altında olmaqda və “üçüncü ölkələrin” maraqları naminə fəaliyyət göstərməkdə ittiham edib. Hansı ölkələrdən söhbət getdiyini təxmin etmək çətin deyil. Üstəlik, Paşinyan onları birbaşa adlandırıb: Rusiya və Belarus. Onun fikrincə, erməni keşişlər “Məsihin qurbangahından” müharibə təbliğ etmək üçün istifadə edirlər. Bütün bunlar “KQB”, “Rusiya” və “Belarus” kimi açar sözlərin Avropa Parlamentində müvafiq reaksiya doğuracağı hesablanaraq səsləndirilir.
Paşinyan özünü sülhün yeganə təminatçısı kimi təqdim edir. Görünür, bu, onun seçki kampaniyasının əsasını təşkil edəcək, yəni onun partiyasına qarşı səs verən hər kəs müharibəyə səs verir kimi təqdim olunacaq. O, erməni seçicilərin yeni silahlı qarşıdurma ilə bağlı ümumi qorxularından istifadə etmək istəyir. Eyni zamanda “qərbli tərəfdaşlara” belə bir mesaj ötürülür ki, guya “qəhrəman Paşinyan” “rus təhlükəsi” ilə üz-üzədir. Həm də o, guya Gürcüstanda Mixeil Saakaşvili, Ukraynada Volodimir Zelenski, Moldovada Maya Sandu kimi “demokratiya mayakı”dır...
Martın 10-da Ermənistanın Xarici Kəşfiyyat Xidməti də respublikanın seçki prosesinə xarici müdaxilə ilə bağlı bəyanat yayıb. Bu müdaxiləni həyata keçirən ölkə birbaşa göstərilməsə də, hamı üçün aydındır ki, söhbət Rusiyadan gedir. Bəyanatda iddia olunur ki, təhlükəsizlik xidmətləri “həmin ölkədə” biznes fəaliyyəti ilə məşğul olan ermənilərə təzyiq göstərir və onları Ermənistan parlament seçkilərində müəyyən siyasi qüvvələri, ehtimal ki, müxalifəti dəstəkləməyə təşviq edir”, - deyə nəşr qeyd edib.
KİV yazıb ki, “təşkilati nəticələr” də özünü çox gözlətməyib. Elə növbəti gün bu bəyanat əsasında Ermənistanın İstintaq Komitəsi seçki prosesinə mümkün xarici müdaxilə ilə bağlı cinayət işi açıb.
“İndi gözləmək olar ki, aparıcı müxalif qüvvələrin seçkilərdə iştirakına qadağa qoyulacaq, müxalif siyasətçilər və fəallar həbs ediləcək, erməni diasporuna isə Rusiyada maksimum təhlükəsizlik tədbirləri altında səs verməyə icazə veriləcək. Qeyd edək ki, bu cür üsullar Moldovada artıq sınaqdan keçirilib və öz effektivliyini göstərib”, - deyə nəşr bildirib.
Alpər Mövludoğlu
Ordu.az
