Ordu.az xəbər verir ki, bu barədə ABŞ Hərbi Dəniz Aviasiya Sistemləri Komandanlığının (NAVAIR) yayımladığı ilkin tender bildirişində məlumat verilib.

Məlumata görə, layihə çərçivəsində sursatların yoxlanılması, sınaqdan keçirilməsi, nasazlıqların müəyyənləşdirilməsi, təmiri və əlaqədar texniki sənədləşdirmə işləri həyata keçiriləcək.

2026-cı il iyunun 4-də dərc olunan bildirişdə Yunanıstan Hərbi Hava Qüvvələrinə məxsus dörd ədəd AGM-154 JSOW “Block II” sursatının istismar müddətinin uzadılması məqsədilə “Raytheon Missiles & Defense” şirkətinə birbaşa sifariş verilməsinin planlaşdırıldığı bildirilib.

ABŞ rəsmiləri qeyd ediblər ki, JSOW sisteminin layihələndiricisi, istehsalçısı və inteqratoru olan “Raytheon” bu işləri yerinə yetirmək üçün zəruri texniki biliklərə, istehsal infrastrukturuna və sertifikatlaşdırma imkanlarına malik yeganə qurumdur.

AGM-154 “Joint Stand-Off Weapon” (JSOW) təyyarədən buraxıldıqdan sonra mühərrikdən istifadə etmədən hədəfə doğru süzülən dəqiq idarəolunan sursatdır.

GPS və ətalətli naviqasiya sistemlərindən istifadə edən sursat daşıyıcı təyyarənin düşmənin hava hücumundan müdafiə sistemlərinin təsir zonasına daxil olmadan hədəfləri vurmasına imkan yaradır.

Yunanıstanın istifadə etdiyi “Block II” versiyası iki istiqamətli məlumat ötürmə kanalı ilə təchiz olunub. Bu xüsusiyyət sayəsində sursat buraxıldıqdan sonra hədəf məlumatları yenilənə və ya başqa hədəfə yönəldilə bilir.

JSOW Yunanıstan Hərbi Hava Qüvvələrinin F-16 qırıcıları ilə inteqrasiya olunub və ölkənin yüksək dəqiqlikli zərbə imkanlarının mühüm elementlərindən biri hesab edilir.

Təmir proqramı çərçivəsində sursatların idarəetmə sistemləri, GPS qəbulediciləri, məlumat ötürmə avadanlıqları, qanad açılma mexanizmləri və döyüş başlığı sistemlərinin yoxlanılması planlaşdırılır.

Sevinc Əliyeva
Ordu.az