Ordu.az Livanın dövlət xəbər agentliyi NNA-ya istinadən xəbər verir ki, sərhəd bölgələrində davam edən toqquşmalar fonunda qala ətrafında İsrailin hava zərbələri və artilleriya atəşləri qeydə alınıb.
Bofor qalası İsrail sərhədindən təxminən 15 kilometr məsafədə yerləşir və Livanın cənub hissəsinin əhəmiyyətli bir sahəsinə hakim mövqedədir. Bu xüsusiyyət onu əraziyə nəzarət baxımından mühüm taktiki nöqtəyə çevirir.
Tarixi baxımdan da xüsusi əhəmiyyətə malik olan obyekt 1980-1990-cı illərdə 18 il ərzində İsrail qüvvələrinin nəzarəti altında olub və İsrail qoşunlarının 2000-ci ildə Livandan çıxarılmasından sonra tərk edilib.
Məlumata görə, Nəbatiyyə bölgəsi də daxil olmaqla Livanın cənub yaşayış məntəqələrinə zərbələr davam edir.
Livan mənbələrinin bildirdiyinə görə, artilleriya atəşləri və hava hücumları bir neçə kəndə təsir göstərib. Ənsaridə üç nəfər həlak olub, Əbba ilə Nəbatiyyə arasındakı yolda isə pilotsuz uçuş aparatının zərbəsi nəticəsində iki livanlı hərbçi yaralanıb.
Livan tərəfi həmçinin bildirib ki, İsrail qüvvələri Litani çayını keçdikdən sonra Yohmor və Zaouta əş-Şərqiyyə daxil olmaqla sərhəd bölgələrində irəliləyişlərini davam etdirirlər.
Beyrut hesab edir ki, bu, İsrail bölmələrinin 2000-ci ildə Livandan çıxmasından sonra həyata keçirdiyi ən dərin irəliləyişdir və ABŞ vasitəçiliyi ilə əldə olunmuş atəşkəs razılaşmasına baxmayaraq ölkənin cənub hissəsinin böyük bir sahəsi hələ də onların nəzarətində qalır.
Livanın baş naziri Nəvvaf Salam hücumları pisləyərək onların dağıntı və əhalinin kütləvi köçürülməsi siyasəti olduğunu bildirib.
O, diplomatik təmasları, o cümlədən İsraillə birbaşa danışıqları davam etdirmək niyyətində olduğunu təsdiqləyib. Baş nazir bu yolu “ən az xərc tələb edən variant” adlandırsa da, onun uğuruna zəmanət verməyib.
Bu arada İsrail və “Hizbullah” arasında qarşılıqlı atəşlər davam edir. Qruplaşma Livana endirilən İsrail hava zərbələrinə cavab olaraq İsrailin şimalına, o cümlədən Kiryat-Şmona və Safed istiqamətlərinə raket zərbələri endirdiyini açıqlayıb.
Qəzza zolağında isə Deyr əl-Bəlahda yerləşən obyektə İsrailin zərbəsi nəticəsində bir tibb işçisinin öldüyü bildirilib. Yerli xəstəxanaların məlumatına görə, hadisə zamanı daha bir neçə nəfər yaralanıb. İsrail ordusu insidenti şərh etməyib.
“Associated Press” yazır ki, fələstinli mənbələrin məlumatına görə, Qəzzada son atəşkəs razılaşmasından etibarən 900-dən çox insan həlak olub. Bölgədə hərbi əməliyyatlar və qarşılıqlı hücumlar davam edir.
Sevinc Əliyeva
Ordu.az
