Ordu.az xəbər verir ki, bu barədə o, “Hayastan” blokunun nümayəndələri ilə birlikdə Spitak sakinləri ilə görüşü zamanı danışıb.

Erməni siyasətçi “tarixi məqam” olduğunu bildirərək sona qədər mübarizə aparmağa hazır olduğunu vurğulayıb.

“Əgər indi ölkədə nəyisə dəyişməsək, çox ciddi problemlərlə üzləşəcəyik. Artıq bununla bağlı siqnallar mövcuddur. Belə təəssürat yaranır ki, hər şey geosiyasi zəlzələyə doğru gedir”, - deyə Köçəryan bildirib.

O iddia edib ki, Nikol Paşinyan Qarabağda İlham Əliyevə 5 milyard dollar dəyərində silah qoyub və bu faktı hər iki tərəf qəbul edir.

Tədbir zamanı iştirakçılardan biri Köçəryana yaxınlaşaraq Paşinyana inandığını bildirib və ondan hakimiyyətdə olduğu dövrdə niyə pilotsuz uçuş aparatları almadığını soruşub.

Bu sual iştirakçıların gülüşünə səbəb olub. Köçəryan isə cavabında bildirib ki, pilotsuz uçuş aparatları dünyada geniş şəkildə yalnız 2017-2018-ci illərdən tətbiq olunmağa başlayıb və bu, onun vəzifədən getməsindən xeyli sonraya təsadüf edir.

“Mən də indiki hakimiyyəti ittiham edə bilərəm ki, 2018-ci ildən sonra niyə almadılar, vəsaiti hara xərclədilər? Pilotsuz uçuş aparatları əvəzinə orduda çiyələk islahatına başladılar. Generalları və polkovnikləri ordudan uzaqlaşdırdılar. Məğlubiyyətin əsas səbəbi budur. Danışıqlar prosesini iflic etdilər və faktiki olaraq müharibənin başlaması üçün hər şeyi etdilər. Təxribat yaratdılar və məğlub oldular, çünki nə etdiklərini anlamırdılar”, - deyə Köçəryan vurğulayıb.

Erməni siyasətçi dünən keçirilən hərbi parad məsələsinə də toxunub. O bildirib ki, Ermənistan tarixində ordu yalnız bir dəfə, 1996-cı ildə təbliğat məqsədilə istifadə olunub.

“Parad keçirdilər və dərhal sonra seçkilərə getdilər. Hamı bunun necə başa çatdığını bilir. Ermənistan tarixinin ən pis seçkiləri oldu. İndi də hakimiyyət üçün eyni nəticə olacaq. Ordunu təbliğat alətinə çevirdilər”, - deyə Köçəryan yekunlaşdırıb.

Alpər Mövludoğlu
Ordu.az