Ordu.az xəbər verir ki, bu barədə Ermənistanın “Past” nəşri “Makronun Paşinyana dəstəyi: Ermənistanın daxili proseslərinə müdaxilə” başlıqlı məqaləsində yazıb.
Nəşrə görə, jurnalist xatırladıb ki, Makron dəfələrlə xarici təsirlərin yolverilməzliyindən danışıb, xüsusilə Rusiyanın müdaxilə təhlükəsinə diqqət çəkib.
“Jurnalist soruşub ki, Ermənistanın baş naziri Nikol Paşinyana seçkilərə cəmi bir ay qalmış açıq dəstək verilməsi ölkənin daxili işlərinə xarici müdaxilə kimi qiymətləndirilə bilməzmi?
“Siz Ermənistanda keçiriləcək seçkilər öncəsi Rusiyanın müdaxiləsindən danışdınız, baş naziri seçkilərə bir ay qalmış dəstəkləyirsiniz, bu dəstəyiniz də xarici müdaxilə deyilmi?”, - deyə jurnalist soruşub.
Sualın qoyuluşu özü-özlüyündə diqqətçəkicidir, çünki bu fikir xarici müşahidəçilərdən deyil, məhz Fransa informasiya məkanının nümayəndəsi tərəfindən səsləndirilib. Bu isə göstərir ki, Fransanın özündə də, xüsusilə söhbət başqa dövlətlərin daxili proseslərindən gedəndə, rəsmi Parisin apardığı siyasətlə bağlı fərqli yanaşmalar mövcuddur.
Makron suala cavab olaraq bildirib ki, onun addımlarını tərəfdaş dəstəyi və demokratik dəyərlərin müdafiəsi kimi təqdim etdiyi üçün burada müdaxilədən danışmaq olmaz.
Lakin bu şərh müzakirələri dayandırmayıb, əksinə, mövzunun həssaslığını daha da ön plana çıxarıb”, - deyə nəşr bildirib.
Müəllif vurğulayıb ki, siyasi və ekspert dairələrində belə hallar çox vaxt yalnız bəyanatlar səviyyəsində deyil, həm də onların arxasında dayanan mümkün maraqlar baxımından qiymətləndirilir.
“Ermənistan məsələsində də Fransanın ölkədəki iqtisadi iştirakının siyasi vurğuların formalaşmasında rol oynaya biləcəyi ilə bağlı fikirlər səsləndirilir. Xüsusilə, su təchizatı sahəsində fəaliyyət göstərən “Veolia” şirkətinin işi diqqət mərkəzinə gətirilir və son illərdə bu şirkətlə bağlı vaxtaşırı tənqidlər səsləndirilir.
Bu kontekstdə daha geniş bir müzakirə formalaşır: tərəfdaş dəstəyi ilə daxili işlərə müdaxilə arasındakı sərhəd haradan keçir? Sual, xüsusilə siyasi bəyanatların konkret iqtisadi maraqlarla üst-üstə düşdüyü və seçki proseslərinin xarici diqqət mərkəzində olan mühüm məsələyə çevrildiyi şəraitdə açıq qalır”, - deyə nəşr bildirib.
Alpər Mövludoğlu
Ordu.az
