Ordu.az xəbər verir ki, Türkiyənin və Avropanın ən böyük müdafiə, aviasiya və kosmik sənaye klasteri olan “SAHA İstanbul” tərəfindən təşkil edilən SAHA 2026 “Anadolu” Agentliyinin qlobal kommunikasiya tərəfdaşlığı ilə 2026-cı il mayın 5-9-da İstanbul Sərgi Mərkəzində keçiriləcək.
ASELSAN geniş məhsul çeşidi ilə sərgidə
SAHA-nın ən böyük stend sahəsinə və ən geniş məhsul çeşidinə malik şirkəti olmağa hazırlaşan ASELSAN sərgidə, başda “Polad Günbəz” komponentləri olmaqla, dənizlərin altından kosmosun dərinliklərinə qədər bütün sahələrdə inkişaf etdirdiyi milli həlləri beynəlxalq nümayəndə heyətlərinə təqdim edəcək.
SAHA çərçivəsində gələcəyi bu gündən formalaşdıran texnologiyaları ilk dəfə nümayiş etdirəcək ASELSAN sərgi boyunca “Mavi Vətən”in yeni zərbə güclərini, “Polad Günbəz” sisteminə yeni imkanlar qazandıracaq texnologiyaları və hava hücumunda oyunun qaydalarını dəyişəcək yeni sistemləri təqdim edəcək.
Hava hücumundan müdafiə sistemləri və yeni nəsil həllər
ASELSAN Türkiyənin müdafiə və qabaqcıl texnologiyalar sahəsində ən mühüm tədbirlərindən biri olan SAHA 2026-da ALP aşağı hündürlük radarı, GÜRZ hibrid hava hücumundan müdafiə sistemi, KORKUT hava hücumundan müdafiə sistemi, EJDERHA antidron sistemi, GÖKBERK mobil lazer silah sistemi və PUHU radioelektron mübarizə sistemi daxil olmaqla çoxsaylı sistemləri nümayiş etdirəcək.
Süni zəkanın bütün imkanlarını AR-GE proseslərində tətbiq edən ASELSAN sərgidə onlarla innovativ həllini təqdim edəcək.
Yerli ekosistem və mükafatlandırma
Təchizatçıları ilə birlikdə gələcəyin texnologiyalarını bu gündən formalaşdırma məqsədilə yerli və milli müdafiə ekosistemini genişləndirən ASELSAN sərgi çərçivəsində milliləşdirmə sahəsində uğur qazanan şirkətləri də mükafatlandıracaq. Bu çərçivədə ən çox milliləşdirmə həyata keçirən, ən çox ixrac edən və ən yüksək əlavə dəyər yaradan şirkətlərə mükafatlar təqdim olunacaq.
Qlobal əməkdaşlıqlar və strateji hədəflər
ASELSAN-ın sərgidə müdafiə sənayesinin qlobal iştirakçıları ilə əməkdaşlıq müqavilələri imzalaması və strateji tərəfdaşlıqları gücləndirməsi planlaşdırılır.
ASELSAN-ın baş direktoru Ahmet Akyol bildirib ki, SAHA 2026 şirkətin qlobal brend yolunda ən mühüm mərhələlərdən biri olacaq və sərgi çərçivəsində ixraca yönəlmiş inkişaf strategiyası üzrə mühüm tərəfdaşlıqlar qurulacaq.
Təqdimatlar və yeni məhsullar
Akyol qeyd edib ki, SAHA Türkiyənin müdafiə sənayesində və qabaqcıl texnologiyalarda çatdığı səviyyəni dünyaya nümayiş etdirən mühüm platformadır: “SAHA-da həyata keçirəcəyimiz təqdimatlarla milli mühəndisliyin gücünü qlobal rəqabətdə göstərəcəyik. 3 təqdimat çərçivəsində 5 yeni məhsulu və 6 məhsulumuzun yeni versiyasını təqdim edəcəyik”.
Qlobal brend hədəfi
Akyol əlavə edib ki, ASELSAN-ın məqsədi artıq seriyalı istehsal imkanları ilə qlobal səviyyədə standartları müəyyən edən əsas oyunçu olmaqdır.
SAHA bu baxımdan ASELSAN-ın qlobal texnologiya brendi olmaq yolunda mühüm sıçrayış platforması olacaq. Sərgi şirkətin artan istehsal imkanları ilə dünya miqyasında təsir gücünü artıracaq, yeni əməkdaşlıqlar və təqdimatlar ixrac üçün yeni bazarların açılmasına şərait yaradacaq. Bu tədbir ASELSAN mühəndisliyinin gücünü qlobal səviyyədə nümayiş etdirmək və rəqabət qabiliyyətini yüksəltmək üçün strateji imkan yaradacaq.
Sevinc Əliyeva
Ordu.az
