Ordu.az xəbər verir ki, bu barədə xarici KİV-lər məlumat yayıb.

Starmer son dövrlərdə baş vermiş bir sıra antisemit hadisələrdən sonra belə addımlar atmağa məcburdur. Bu hadisələrə bu həftə Şimali Londonun Qolders Qrin qəsəbəsində, böyük yəhudi icmasının yaşadığı ərazidə iki kişinin bıçaqlanması da daxildir.

Somalidə doğulmuş 45 yaşlı Böyük Britaniya vətəndaşı cümə günü ilk dəfə məhkəməyə çıxarıldıqdan sonra qətl cəhdində ittiham olunaraq saxlanılıb.

Həyat yoldaşı yəhudi mənşəli olan Böyük Britaniyanın Baş naziri bildirib ki, çoxsaylı yəhudilər onlara etiraz aksiyalarının “təkrarlanan xarakterindən” təsirləndiklərini deyiblər.

“Mən söz azadlığının və dinc etirazların böyük tərəfdarıyam. Lakin “intifadanı qlobal edək” kimi şüarlar səsləndiriləndə bu, qətiyyən qəbuledilməzdir. Aydındır ki, bununla bağlı daha sərt tədbirlər görülməlidir”, - deyə o bildirib.

İntifada 1987-1993-cü illərdə və 2000-ci illərin əvvəlində fələstinlilərin İsrailə qarşı mülki üsyanlarını ifadə edir.

Starmer bildirib ki, yürüşlər zamanı istifadə olunan ifadələrə daha ciddi nəzarət etmək istəyir və bəzi hallarda müəyyən etiraz aksiyalarının tamamilə dayandırılması zəruridir.

“Böyük Britaniyanın yəhudi icması bu şüarı “çox təhlükəli” hesab edir”, - deyə Starmer əlavə edib.

Cümə axşamı Böyük Britaniya təhlükə səviyyəsini ikinci ən yüksək səviyyə olan “ciddi” səviyyəyə qaldırıb. Bu qərar qismən Qolders Qrində baş verən terror hücumu, həmçinin “ekstremizm və ifrat sağçı qüvvələrin təhdidi” ilə bağlıdır.

Polis bildirib ki, gələcək etiraz aksiyaları ilə bağlı bütün müraciətlər diqqətlə araşdırılacaq.

Sevinc Əliyeva
Ordu.az