Ordu.az xəbər verir ki, Türkiyənin və Avropanın ən böyük müdafiə, aviasiya və kosmik sənaye klasteri olan “SAHA İstanbul”un təşkilatçılığı ilə keçirilən SAHA 2026 Beynəlxalq Müdafiə, Aviasiya və Kosmik Sənaye Sərgisi 5-9 may tarixlərində İstanbul Sərgi Mərkəzində baş tutacaq.

“Anadolu” Agentliyinin “Texnologiyanın ürəyi SAHA-da döyünəcək” başlıqlı dosyesinin 13-cü xəbərində Türkiyə müdafiə sənayesi çərçivəsində “Promec” tərəfindən hazırlanmış “Pro-Mavzer” uzaqdan atəş idarəetmə sistemi təqdim olunub.

“Promec”in Biznesin İnkişafı və Xarici Ticarət üzrə direktoru Oğuz Ünlü AA müxbirinə açıqlamasında şirkətin mühəndislik əsaslı təcrübə üzərində qurulmuş həllər hazırladığını bildirib.

Müdafiə sənayesi üzrə fəaliyyətlərini uzun illərə dayanan mühəndislik bazası üzərində qurduqlarını qeyd edən Ünlü belə deyib: “Promec” 2014-cü ildə yaradılmış mühəndislik şirkətidir. Biz fəaliyyətimizə mexaniki dizayn işləri ilə başladıq. Daha sonra elektromexaniki sistemlər, yönləndirmə sistemləri, üçayaqlı dayaq sistemləri ilə müdafiə sənayesinə dəstək verəcək şəkildə təşkil olunduq. Şirkətimizdə təxminən 130 nəfər çalışır. Onların yarıya yaxını mühəndisdir və 50 nəfərlik AR-GE komandamız var. Biz həm məhsul hazırlayırıq, həm də onları özümüz istehsal edərək müştərilərimizə layihə tərəfdaşı kimi təqdim edirik”.

“Pro-Mavzer”in sahədəki personalın təhlükəsizliyini artırmaq məqsədilə hazırlandığını bildirən Ünlü sistemin yaradılmasında əməliyyat sahəsindəki ehtiyacların əsas rol oynadığını vurğulayıb.

Müasir döyüş mühitində yalnız yüksək atəş gücünün kifayət etmədiyini qeyd edən Ünlü sistemin əsas məqsədi barədə belə deyib:

“Pro-Mavzer” uzaqdan atəş idarəetmə sistemi tək bir piyada əsgərinin öz silahı ilə çox asan qurub uzaqdan idarə edə biləcəyi bir sistemdir. Müasir döyüş meydanında yalnız yüksək atəş qabiliyyəti uğur gətirmir. Bununla yanaşı hədəfin aşkarlanması, tanınması və operatorun təhlükəsizliyi də vacibdir. Bunların birlikdə təmin olunması əməliyyat sahəsində uğur gətirir”.

“Pro-Mavzer”in sadəcə silah platforması deyil, inteqrasiya olunmuş sistem həlli olduğunu vurğulayan Ünlü sistemdəki alt komponentlərin hərbi standartlara uyğun hazırlandığını qeyd edib.

Sistemin müşahidə və yönləndirmə imkanları ilə bağlı texniki detalları açıqlayan Ünlü belə deyib:

“Sistemin üzərində kamera sistemi mövcuddur. Operator uzaqdan idarə edərək müşahidə aparır. Eyni zamanda sistemdə yönləndirmə bloku var. Bu blok üfüqi ox üzrə 360 dərəcə hərəkət edə bilir, şaquli ox üzrə isə müsbət və mənfi 45 dərəcə hərəkət imkanına malikdir. Üçayaqlı dayaq sistemi, elektro-optik sistem və silah daxil olmaqla bütün komponentlər hərbi standartlara uyğun hazırlandığı üçün hər cür hava və ərazi şəraitində istifadə oluna bilir”.

“Sistem bütövlüyü çərçivəsində sahəyə çıxmağa hazırdır”

“Pro-Mavzer”in təxminən iki illik intensiv inkişaf mərhələsindən sonra inkişaf səviyyəsinə çatdığını bildirən Oğuz Ünlü sistemin artıq sahədə istifadə üçün hazır olduğunu deyib.

Ünlü əlavə edib: “Bu kompleks sistem olduğu üçün üçayaqlı dayaq sistemi, elektro-optik sistem və silah kimi bütün alt sistemlərin uyğun işləməsi vacibdir. Bu il bunu təmin etdiyimizi düşünürük. Alt komponentlər ayrı-ayrılıqda sahədə özünü sübut edib. Lakin sistem bütövlüyü çərçivəsində də artıq sahədə istifadə ediləcəyini hesab edirik”.

Ünlü “Pro-Mavzer”in müxtəlif piyada tüfəngləri ilə uyğun işləmək üçün hazırlandığını bildirərək məhsulun elastik inteqrasiya quruluşuna malik olduğunu deyib. O bildirib: “Bizim əsas məqsədimiz istənilən piyada tüfəngini bu sistemə inteqrasiya edə bilməkdir. İstifadə olunacaq silah növünə görə uyğun interfeys dəyişikliklərini edə bilirik”.

“Promec”in müdafiə sənayesində bir çox layihədə aktiv iştirak etdiyini bildirən Ünlü “Pro-Mavzer”in də bu fəaliyyətlərin mühüm nəticələrindən biri olaraq SAHA 2026 çərçivəsində tərəfdaşlara təqdim ediləcəyini qeyd edib.


Sevinc Əliyeva
Ordu.az