Ordu.az xəbər verir ki, bunu Ermənistanın baş naziri Nikol Paşinyan Ermənistan-Avropa İttifaqı vətəndaş cəmiyyəti platformasının 8-ci ikitərəfli görüşündə çıxış edərkən deyib.
“Bu problem yaxın vaxtlarda yeni konstitusiya qəbul edərkən həll etməli olduğumuz ən vacib məsələlərdən biridir, çünki Ermənistanda ədalət və ədalətlilik əsasən cəmiyyətdən təcrid olunmuş, xalqla üzvi əlaqəsi olmayan institutlar tərəfindən idarə olunur”, - deyə Paşinyan bildirib.
O hesab edir ki, bu gün Ermənistanda ədalət və ədalətlilik sistemi əsasən cəmiyyətdən təcrid olunmuş və xalq qarşısında kifayət qədər hesabatlılıq və məsuliyyət daşımayan institutlar tərəfindən idarə olunur. “Mən bu məsələnin kökünə vararkən belə bir nəticəyə gəldim ki, ədalət və ədalətlilik konstitusiya və qanunlara uyğunluq deməkdir. Bəs konstitusiyanın özü hakimiyyətin əsas mənbəyi ilə üzvi əlaqəyə malik olmadıqda nə etməli?”, - deyə Paşinyan qeyd edib.
Onun sözlərinə görə, belə şəraitdə istənilən addım cəmiyyət tərəfindən ədalətli kimi qəbul edilməyəcək. “Konstitusiya xalqın azad iradəsinin ifadəsi olmalıdır, lakin etiraf etməliyik ki, bizdə belə bir konstitusiya yoxdur və heç vaxt olmayıb. Əgər bu iradənin mənbəyi xalqdan qopubsa, həmin mexanizmin işləməsi heç vaxt ədalət kimi qəbul edilə bilməz”, - deyə Paşinyan bildirib. Onun sözlərinə görə, bu, fundamental problemdir və həll olunmalıdır.
Paşinyan qeyd edib ki, bu kontekstdə Ermənistan hakimiyyəti üçün Avropa institutları, eləcə də Avropa İnsan Hüquqları Məhkəməsi ilə əməkdaşlıq son dərəcə vacibdir. “Bizim məqsədimiz səhvlərimizi gizlətmək və hər şeyin mükəmməl olduğunu göstərmək deyil. Əksinə, beynəlxalq institutlarla əməkdaşlığımızın əsas məqsədi buraxılan səhvləri düzəltmək üçün mexanizmlər əldə etməkdir, çünki heç səhv etməmək kimi bir hədəf düzgün deyil”, - deyə o bildirib.
Paşinyan qeyd edib ki, məqsəd səhvləri tam aradan qaldırmaq deyil, onları minimuma endirmək və effektiv düzəliş mexanizmləri yaratmaqdır.
“Bir ifadə diqqətimi cəlb etdi ki, hökumətin bir çox institutları təklifləri hələ də süngü ilə qarşılayır. Mən bunu başa düşürəm, amma hökumətin iradəsiz, amorf bir qurum olduğunu qəbul etmirəm. Gəlin rolları dəyişək: siz idarə edin, biz təklif verək. Amma demirəm ki, hökumət hər şeyi rədd etməlidir”, - deyə o bildirib.
Paşinyan bildirib ki, hökumət təklifləri tənqidi şəkildə qəbul etməyə davam edəcək, lakin vətəndaş cəmiyyəti ilə dialoq vasitəsilə bu “süngülər” aradan qalxmalıdır, çünki prosesin mahiyyəti məhz budur.
“Dövlət mürəkkəb sistemdir və onun özünümüdafiə mexanizmləri olmalıdır. Məsələn, elektron poçtla ən faydalı fayllarla birlikdə viruslar da gəlir və sistemləri sıradan çıxara bilər. Buna görə hər şey yoxlanmalı, yenidən qiymətləndirilməlidir. Eyni zamanda dövlətin suverenliyi, təhlükəsizliyi təmin edilməlidir”, - deyə o qeyd edib.
Paşinyan bildirib ki, Ermənistan Avropa İttifaqı ilə əməkdaşlığı davam etdirmək və dərinləşdirmək niyyətindədir. “Hərtərəfli və genişləndirilmiş tərəfdaşlıq sazişi bizim üçün iş gündəliyidir, lakin etiraf etməliyik ki, bu gündəlik son illərdə münasibətlərin sürətli inkişafı nəticəsində formalaşıb”, - deyə o qeyd edib.
O xatırladıb ki, Ermənistanda Aİ-yə üzvlük prosesinə başlamaq barədə qanun qəbul edilib. Paşinyan vurğulayıb ki, bu sənəd təzyiq və ya şantaj aləti deyil. “Biz bu prosesi şantaj vasitəsinə çevirməyəcəyik. Məqsədimiz ölkə olaraq Aİ standartlarına uyğunlaşmaq və islahatları davam etdirməkdir”, - deyə o bildirib.
Paşinyan istisna etməyib ki, Aİ genişlənmə siyasətindən imtina edə bilər və Ermənistan heç kimə öz iradəsini qəbul etdirə bilməz. “Əgər Aİ bizi qəbul edərsə, çox yaxşı. Əgər etməsə, yenə də biz qalib olacağıq, çünki müasir standartlara uyğun ölkə olacağıq”, - deyə o vurğulayıb.
Paşinyan sözlərini belə yekunlaşdırıb: “Ermənistan-Aİ vətəndaş cəmiyyəti platformasının fəaliyyəti bu baxımdan çox vacibdir. Biz vətəndaş cəmiyyətinin rolunu yüksək qiymətləndiririk və əməkdaşlığı daha da genişləndirəcəyik”.
Alpər Mövludoğlu
Ordu.az
