Ordu.az xəbər verir ki, Türkiyənin TUSAŞ şirkətinin baş direktoru Mehmet Demiroğlu dünyanın ən əhəmiyyətli müdafiə sənayesi sərgilərindən biri olan IDEX 2025 çərçivəsində jurnalistlərə verdiyi müsahibədə Birləşmiş Ərəb Əmirliklərinin (BƏƏ) də “Kaan” ilə maraqlandığını açıqlayıb.

Demiroğlu ilk dəfə olaraq hadisələrin təfərrüatlarını paylaşıb.

TUSAŞ-ın BƏƏ bazarında çox güclü oyunçu olduğunu vurğulayan Demiroğlu həm dövlət qurumları, həm də özəl şirkətlərlə fərqli layihələr üzərində çalışdıqlarını bildirib.

O, BƏƏ-də fəaliyyət göstərən “Calidus” şirkəti ilə TUSAŞ arasında müqavilə imzalandığı məlumatını paylaşıb.

“Bu çərçivədə “Hürkuş”u necə birlikdə qura biləcəyimiz və onların hazırladığı təyyarələri necə birlikdə inkişaf etdirəcəyimiz mövzusunda razılığa gəldik. Bunun üçün müqavilə imzalayacağıq”, - deyə Demiroğlu bildirib.

TUSAŞ baş direktoru ölkədəki bir çox müdafiə sənayesi şirkətinin “Kaan” layihəsi üzərində çalışdığını vurğulayıb.

“Belə böyük bir layihədə kənar tərəfdaşları və maraqlı tərəfləri öz üzərinə götürmək olduqca ağlabatandır. İctimaiyyətə məlum olduğu kimi, biz bu məsələdə Səudiyyə Ərəbistanı ilə çox sıx işləyirik. Başqa ölkələr üçün də inkişaf ola bilər. Siyahıya hətta BƏƏ-ni də əlavə etmək olar. Ötən gün bizə bunu yüksək səviyyədə dedilər və bununla məşğul olacaqlarını bildirdilər”, - deyə o əlavə edib.

Sevinc Əliyeva
Ordu.az