Ordu.az xəbər verir ki, bu barədə “Mehr” agentliyi məlumat yayıb.

Qaani sosial şəbəkələrdə paylaşdığı müraciətdə qeyd edib ki, İsrailə qarşı Aşura ruhu və imam Hüseyndən ilham alan imanla mübarizə aparan insanlar eyni əbədi inanca sahibdirlər.

“Qoy sionistlər bilsinlər ki, sizə qarşı dayanan və döyüşənlər eyni əbədi inancı daşıyırlar: “Hər gün Aşuradır, hər torpaq isə Kərbəladır”, - deyə o bildirib.

Qaani əlavə edib ki, sionistlər bütün Livanı tərk etməlidirlər, çünki bu torpaq dözümlülük və müqavimət meydanıdır, işğalçılar üçün oyun sahəsi deyil.

O həmçinin xəbərdarlıq edib ki, əgər İsrail bu gün könüllü şəkildə geri çəkilməsə, sabah alçaldılmış və məğlub vəziyyətdə qaçmağa məcbur olacaq.

“Qüds” Qüvvələrinin komandanı 2000-ci ildə İsrailin Cənubi Livandan çıxmasını və “Hizbullah”ın mərhum lideri Həsən Nəsrullahın Bint Cübeyldə etdiyi tarixi çıxışı da xatırladıb.

“2000-ci ili və şəhid Seyid Həsən Nəsrullahın Bint Cübeyldəki tarixi müraciətini unutmayın. Həmin vəd hələ də qüvvədədir və heç bir şübhə yoxdur ki, eyni səhnə yenidən təkrarlanacaq”, - deyə o vurğulayıb.

Sevinc Əliyeva
Ordu.az