Ordu.az xəbər verir ki, şirkətlərin yaydığı məlumata görə, ilk mərhələdə “Destinus Hornet” önləyici platforması əlavə effektor kimi “Diehl Defence” şirkətinin GARMR sisteminə inteqrasiya ediləcək.

Razılaşma gələcəkdə “Hornet” platformalarının IRIS-T hava hücumundan müdafiə sistemlərində əlavə məhvetmə vasitəsi kimi istifadəsi üçün də zəmin yaradır.

“Hornet” yüksək sürətli hava hədəflərinin, xüsusilə reaktiv mühərrikli kamikadze tipli pilotsuz uçuş aparatlarının və idarə olunan aviasiya bombalarının qarşısını almaq üçün hazırlanıb.

Belə hədəflərə qarşı bahalı zenit raketlərindən istifadə onların məhv edilməsini təmin etsə də, kütləvi hücumlar şəraitində bu yanaşma geniş tətbiq üçün əlverişli hesab edilmir.

“Hornet” əlavə effektor təbəqəsi yaradaraq sistemin sursat ehtiyatını artırır və bahalı önləyici raketlərin daha mürəkkəb hədəflər üçün saxlanılmasına imkan verir.

“Destinus” şirkətinin baş direktoru Mixail Kokoriç bildirib ki, müasir hava hücumundan müdafiə artıq yalnız imkan məsələsi deyil, həm də hər bir məhvetmənin xərc məsələsidir.

İnteqrasiya GARMR sisteminin standartlaşdırılmış interfeyslərə malik modul arxitekturası əsasında həyata keçirilir. Bu yanaşma vahid idarəetmə sistemi daxilində müxtəlif effektorların və tətbiq konsepsiyalarının istifadəsinə imkan verir.

Yolsuzluq avtomobili platformasında qurulmuş mobil GARMR sistemi modul prinsip əsasında hazırlanıb. Kompleks 7,62 mm və 12,7 mm pulemyotları “Cicada” önləyici platformaları ilə birləşdirir, indi isə bu siyahıya “Hornet” platformaları da əlavə olunur.

Sistem radar və elektro-optik sensorlar vasitəsilə hava mənzərəsini formalaşdırır və inteqrasiya olunmuş hava hücumundan müdafiə şəbəkəsi daxilində fəaliyyət göstərə bilir. Süni zəka alqoritmləri hədəfləri avtomatik aşkar edir və prioritetləşdirir, lakin atəş açmaq qərarı ekipaj tərəfindən verilir.

Sevinc Əliyeva
Ordu.az