Ordu.az xəbər verir ki, bu gün Baqrat Sarkisyan və digərlərinin işi üzrə keçirilən məhkəmə iclasında sədrlik edən hakim Karen Farkhoyan vəkillərin vəsatətlərini rədd edib və Artur Sarkisyanın ev dustaqlığını daha 2 ay uzadıb.
Erməni vəkil Emin Xaçatryan xahiş etmişdi ki, Artur Sarkisyanın qətimkan tədbiri inzibati nəzarətlə əvəz olunsun və bu, 20 milyon dram olan girov məbləğinin 5 milyon artırılaraq 25 milyon dram edilməsi ilə müşayiət edilsin.
Müdafiə tərəfi xatırladıb ki, Artur Sarkisyan iyunun 7-də keçiriləcək seçkilərdə deputatlığa namizəddir və onu həbsdə saxlamaq namizədlər üçün bərabər şəraitin təmin edilməsinə dair qanun tələbinin pozulmasıdır.
İttiham tərəfi isə öz növbəsində ev dustaqlığının 3 ay uzadılmasını tələb edib. İctimai ittihamçı Hayk Hovhannisyan bildirib ki, istintaqa maneə törədilməsi və üzərinə qoyulan prosessual öhdəliklərin yerinə yetirilməməsi ilə bağlı risklər hələ də qalır. Onun sözlərinə görə, ilkin məhkəmə iclasları başa çatsa da, iş əsas məhkəmə baxışı mərhələsinə keçsə də, sübutların araşdırılmasına hələ başlanmayıb.
Seçki kampaniyasında iştirak məsələsinə gəlincə, ictimai ittihamçı bildirib ki, namizəd seçki prosesinə etibarlı şəxslər vasitəsilə də qoşula bilər.
“Mənə deyin, Artur Sarkisyanın belə şəraitdə öz hüquqlarını necə həyata keçirməsini təsəvvür edirsiniz? O, deputatlığa namizəddir, cəmiyyətlə ünsiyyət qurmaq imkanı olmalıdır. Əgər bu gün onun qətimkan tədbiri daha yüngül tədbirlə əvəz edilməsə, bu, seçki prosesinə birbaşa müdaxilə olacaq. Çünki o, seçici kütləsi ilə ünsiyyət qurmaqla ümumi səsvermə nəticələrinə təsir göstərə bilər. Artur Sarkisyan artıq üzərinə qoyulan öhdəlikləri heç vaxt pozmadığını sübut edib”, - deyə müdafiə tərəfi bildirib.
Xatırladaq ki, fevralın 26-da İrəvan ümumi yurisdiksiya məhkəməsi erməni hakim Karen Farkhoyanın sədrliyi ilə “Hayastan” fraksiyasının deputatı Artur Sarkisyan barəsində tətbiq edilmiş ev dustaqlığı qətimkan tədbirini 3 ay müddətinə uzatmaq qərarı vermişdi.
Artur Sarkisyan 2025-ci il iyulun 9-dan həbsdədir. Ermənistan İstintaq Komitəsinin məlumatına görə, Baqrat Sarkisyan və digərləri Ermənistanda terror aktları və hakimiyyəti ələ keçirməyə yönəlmiş hərəkətlər planlaşdırıblar.
Alpər Mövludoğlu
Ordu.az
