Ordu.az xəbər verir ki, bu barədə WANA agentliyi məlumat yayıb.

Asif qeyd edib ki, onun “öncəgörməsi” hərbi əməliyyatların yenidən başlamayacağını göstərir, çünki ABŞ ictimaiyyəti artıq regionda birbaşa hərbi müdaxiləni dəstəkləmir.

Pakistanlı nazir “Geo News” telekanalının “Capital Talk” proqramına müsahibəsində bildirib ki, İsrail onun fikrincə müharibənin yenidən başlanmasının tərəfdarıdır və ABŞ-ni münaqişəyə cəlb etməyə çalışır.

“İnsanlar müharibələri dəstəklədikdə müharibələr baş verir. İctimai dəstək olmayanda müharibələr başlamır”, - deyə Asif vurğulayıb.

Məlumata görə, Pakistan hazırda İran ilə ABŞ arasında atəşkəs prosesi üzrə vasitəçi rolunu öz üzərinə götürüb.

Tehran və Vaşinqton arasında apreldə keçirilən danışıqların ilk mərhələsi nəticəsiz başa çatsa da, İslamabadın vasitəçiliyi ilə dolayı formatda təklif mübadiləsi davam etdirilir.

Mənbələrin bildirdiyinə görə, davam edən diplomatik səylər münaqişəni dayandırmalı və gərginliyin daha da artmasının qarşısını almalı olan çərçivə sazişinin hazırlanmasına yönəlib.

Tehran hesab edir ki, ilkin razılaşma bütün istiqamətlərdə hərbi əməliyyatların dayandırılmasını, sanksiyaların ləğvini, müharibənin vurduğu ziyanın ödənilməsini və Hörmüz boğazı ilə bağlı məsələlərin həllini əhatə etməlidir.

İran rəsmiləri əlavə ediblər ki, nüvə proqramı ölkənin dinc məqsədli uran zənginləşdirmə hüququnun qorunması şərti ilə daha sonrakı mərhələdə müzakirə oluna bilər.

ABŞ Prezidenti Donald Tramp isə öz növbəsində bildirib ki, İranla istənilən razılaşma Tehranın nüvə silahı əldə etməyəcəyinə təminat verməlidir. Tramp həmçinin xəbərdarlıq edib ki, danışıqlar uğursuz olarsa, hərbi zərbələr yenidən başlaya bilər.

Sevinc Əliyeva
Ordu.az