Ordu.az xəbər verir ki, bu barədə xarici KİV-lər məlumat yayıb.
Ukrayna Müdafiə Nazirliyinə görə, istehsal olunan bütün pilotsuz uçuş aparatları Ukrayna ordusuna təhvil veriləcək. Layihə Norveç tərəfindən 2026-cı il üçün Ukraynaya ayrılan 7 milyard dollarlıq müdafiə dəstəyinə əlavə resurslarla maliyyələşdiriləcək.
Saziş Kiyevdə Norveçin Ukraynadakı səfiri Lars Raqnar Aalerud Hansen və Ukraynanın müdafiə nazirinin müavini (Avropa inteqrasiyası üzrə) Serhiy Boyev tərəfindən imzalanıb. Daha əvvəl Norveçin Ukrayna şirkətinin lisenziyası əsasında pilotsuz uçuş aparatı istehsalı edəcəyi bildirilmişdi.
Norveçdə istehsal edilən ilk sistemlərin bu yay Ukrayna Müdafiə Qüvvələrinə təhvil verilməsi planlaşdırılır. Saziş həmçinin tədqiqat-inkişaf fəaliyyətlərini də əhatə edən daha geniş sənaye əməkdaşlığını ehtiva edir.
Norveçin müdafiə naziri Tore Onşuus Sandvik deyib: “Ukraynanın mübarizəsinə dəstək olmaq Norveçin təhlükəsizliyi üçün etdiyimiz ən mühüm işdir. Bu, qarşılıqlı fayda təmin edən əməkdaşlıqdır. Norveç-Ukrayna əlaqələrini gücləndirən konkret addım olmaqla yanaşı, Norveç müdafiə sənayesini də dəstəkləyir və Ukraynanın Norveç ərazisində təhlükəsiz şəkildə pilotsuz uçuş aparatı istehsal etməsinə imkan yaradır”.
Sandvik həmçinin bu layihədən əldə ediləcək təcrübənin Norveçin bu kritik sahədə istehsal gücünü artırmasına töhfə verəcəyini ifadə edib.
Qarşılıqlı qazanc və müdafiə sənayesi əməkdaşlığı
Ukrayna üçün müttəfiqlərlə texnologiya və sənaye sahəsində qarşılıqlı faydaya əsaslanan əməkdaşlıqlar prioritet məsələlər arasındadır. Bu çərçivədə Norveçin 2026-cı il ərzində Ukrayna Müdafiə Qüvvələri üçün Ukrayna istehsalı silahların tədarükünə ümumilikdə 1,5 milyard dollardan çox resurs ayırması planlaşdırılır.
Ukraynanın müdafiə naziri Mixaylo Fedorov isə açıqlamasında deyib: “Norveçə Ukraynanın kritik ehtiyaclarına fokuslanan sabit dəstəyinə görə təşəkkür edirəm. Birgə istehsal layihələri və bölmələr üçün zəmanətli pilotsuz uçuş aparatı təchizatı sahədə gücümüzü birbaşa artırır. Norveç effektivliyi sübut olunmuş texnologiyaları istehsal etmək imkanı əldə edərkən, Ukrayna cəbhədə təşəbbüsü yenidən qazanmaq üçün ehtiyac duyduğu pilotsuz uçuş aparatlarına qovuşur. Bu, əsl mənada qazan-qazan tərəfdaşlığıdır”.
Sevinc Əliyeva
Ordu.az
